Zanin aṭangin IPL khelh ṭan dawn
Cricket khawvela sum tamna ber Indian Premier League vawi 14-na chu zanin hian khelh ṭan a ni dawn a, MA Chidambaram Stadium-ah Mumbai Indians leh Royal Challengers Bangalore te an inkhel ang.
Season liam ta kha Covid-19 vangin India ramah khelh theih a ni lo a, UAE-ah khelh a ni. Kuminah erawh India ram khawpui paruk - Bangalore, Delhi, Ahmedabad, Mumbai, Chennai leh Kolkata-ah te khelh a ni dawn.
Team pariat
IPL vawi 14-naah hian team pariat Chennai Super Kings, Delhi Capitals, Kolkata Knight Riders, Mumbai Indians, Punjab Kings, Royal Challengers Bangalore, Rajasthan Royals leh Sunrisers Hyderabad te an inel dawn.
Zanina inkhel tur Mumbai Indians hi champion lai an ni a, nikum khan a vawi nga nan an champion. Tun ṭumah hian ṭum dang ang thoin team tin hi vawi hnih ṭheuh an inkhel chhuak ang a, chumi zawhah playoff an khel leh ang.
CAM Secretary
IPL opening match chhim tur hian CAM secretary Mamon Majumdar a kal a, ani hi IPL-ah hian governing council member a ni bawk.
Mamon-a chuan, "Covid-19 vangin tih tur a tam lehzual a, Bio Bubble chhungah team member zawng zawng an awm a ngai. Hotel thlennaah chauh an awm thei a, training-na leh ground-ah bus-in a hruai ang a, a ṭhiante an hmu thei lo. An vawi khat dan bawhchhiatnaah pawisa chawitir an ni ang a, an bawhchhe nawn a nih chuan inkhel thei lo tura hrem an ni ang," tiin Vanglaini a hrilh.
IPL atana a duhthusam sawi zuiin Mamon-a chuan, "India ramah Covid-19 a pung leh ta hle. Hemi a nih avang hian tluang taka zawh theih hi kan duhthusam chu a ni. Chumi kan puitlin theih nan chuan RT-PCR test pawh ni khat kar thlakin an nei a, kan fimkhur takzet. Tun hnaiah India an chet ṭhat avangin TV aṭanga entu an pun viau kan ring bawk," tiin a sawi.
IPL match hmasa lam hi Covid-19 vangin entu an awm thei dawn lo a, a hnu lamah erawh hripui boruak a zira ennawn leh tur a ni ang.
Inkhel tur chu
Mumbai Indians hian cricket legend Sachin Tendulkar-a fapa Arjun Tendulkar an la thar a, a khel ve a nih ngai chuan an che ṭha lo a nih pawhin chanchin ngaihven hlawh ber a ni phak ang.
Inkhel bik hrim hrim thlir erawh chuan Mumbai captain Rohit Sharma leh Royal Challengers captain Virat Kohli inhmachhawn tur ringawt pawh hi a ngaihnawm. IPL a nih miau avangin player ṭha rual team tinah an awm khawm a, cricket ngainatute tan chuan hman phal chi a ni lo ang.
