Newcastle fan-ten an club lei an duh

Premier League club Newcastle United ṭantu pawl Newcastle United Supporters Trust (NUST) chuan an club neitu Mike Ashley-a'n Magpies chu a hralh thei dawn a nih chuan share neih ve an duh thu an sawi a, fan-te chu an club-a share an neih theihna tura pawisa thawh khawm turin an sawm.

Magpies hi nikum khan Saudi Arabia PIF, PCP Capital Partners leh Reuben Brothers ṭangkawp chuan pound maktaduai 300-in an lei hman ṭep a, mahse, an beisei angin a hlawhtling ta lo.

Newcastle neitu Ashley chuan a club hi hralh a la duh reng a, NUST chair Greg Tomlinson chuan fan-te chu, "Kan thusawi umphak turin sum i thawh ang u," tiin a sawm a ni.

Greg Tomlinson chuan, "Hun rei tak chhung chu fan-te hi club nunna ber an nih thu hrilh an ni tawh a, mahse, thutlukna liantham siam a nih dawn apiangin an en kan leh si. Hringnun ang thoin football-ah pawh vanduaithlak takin sum hi a pawimawh ber chu a ni si.

"Sum kan thawhkhawm theih chuan club hralh a nih hunah pawh kan thusawiin awmze thui tak a nei thei dawn a ni," a ti a, 'The 1892 Pledge' tih hming chawiin sum hi an khawn a ni.

NUST chuan 'The 1892 Pledge' chu kum thum chhung an duan thu a sawi a, club hma hun himna tura duang an nih thu a sawi.

Member 14,000 chuang nei anga insawi NUST chuan, "NUST chuan club hralh a nih chuan fan-ten share an neih emaw, relegation palha sum hlohnain neitu inthlak thlenga nghawng a neih palha a lo puih ve theih nan sum tam tham tak siam a tum a ni," an ti a, NUST guardian pali zingah Newcastle leh England defender hlui Warren Barton leh an khaw chhuak MP Ian Mearns-te an tel.

NUST chuan club-a share neih an tumna chu a hlawhtling lo a nih chuan an sum hmuh zawng zawng chu midang ṭanpui nana hman a nih tur thu an sawi a ni.

Premier League match 30 khelh tawhah Newcastle United hi table-ah 17-na an ni mek a, relegation zone aṭanga an himna hi point thum leh hmun khat chiah a ni - Pathianni tlai dar 4:30-ah league match khel turin Burnley an lenchilh ang.