Inter Milan tan Serie A title a hnai zel
Serie A nomawi chu Juventus lak aṭangin an chhuhsak ngei dawn niin a lang ta. Inter Milan chuan Sassuolo 2-1 a hnehin hmahruaitu an nihna an sawhnghet a, anmahni hnaih bertu AC Milan aiin point 11-in an sang zawk.
Nilaini zan inkhel dangah Juventus chuan an mikhual Napoli 2-1 in an hneh ve bawk. Old Lady hian hnehna chang mah se Inter nen an inkarah point 12 zet a awm tawh a, league match khelh hmabak pakua an la nei.
Inter an fal
San Siro-a inkhelah Romelu Lukaku chuan minute 10-na lekah goal hmahruai a tauh lut, chawhlawk hnuah season hmang ṭha tak Lautaro Martinez-a'n counter attack aṭangin an goal hnihna a khung bawk; hun tawp dawna Hamed Traore goal khungin Sassuolo a chhan zo tawh lo.
A naute khelh danah Antonio Conte a lawm a, a pawimawh ber chu season tawpa 'Scudetto' lak theih a nih thu a sawi. Conte chuan, "A tawp kan la thleng lo, kan tum ram thleng turin hmabak kan la ngah hle.
"Sassuolo inkhel kha ngun taka in en chuan harsatna min siam hnem tih in hmu ang. Serie A team tin mai hi midang hneh turin an ṭha tawk vek, chuvangin kan khelh hmabak la awmah hian nasa taka chetsual theih a la ni," a ti.
Italian manager chuan sawi zawmin, "Khelh hmabakah vawi ruk kan chak leh a nih chuan kan champion thei dawn, amaherawhchu vawi ruk chak tur chuan kaltluan a ngai hle. Chutihrualin dinhmun ṭha takah erawh kan ding mek," tiin an thlen chinah a lungawi viau.
An inkhel ta
Ruahman lawk ang chuan kal thei ni se Juventus leh Napoli te hi nikum October 4 a inkhel tur kha an ni. Mahse, hri leng vangin Naples aṭangin Napoli an zin chhuak thei lo a, 3-0 a chak loah puan niin an point neihsa an paihsak bawk.
Mahse Napoli hian an khing let a, Serie A thuneitu lam chuan inkhel ṭha turin an ti. Allianz Stadium-ah Gennaro Gattuso naute an lenglut ta ngei a, amaherawhchu an duh leh beisei ang result erawh an hlawh chhuak thei lo.
Cristiano Ronaldo leh Paulo Dybala te goal hmangin Juve hian hnehna an chang a, mikhual team tana Lorenzo Insigne pnelty chhuih luh chu point sualchhuah nan a tawk zo lo - anmahni mualah Juve an chak.
Chak lo Napoli hian point 56 an nei a, pangana dinhmun an luah. Champions League khel phak china awm Atalanta an phak lohna chu point hnih chauh a ni a, chutihrualin an hnuaia awm Lazio nen an inkarah pawh point hnih bawk a awm - UCL khelhna inchuh boruak a sang dawn.
Insiamṭhat tum Pirlo
A zawna season kua ngawt an kawl tawh Serie A title chu nasa takin a nghing mek a, sawiselna karah Andrea Pirlo a awm mek. Napoli hma hian an match hnuhnung pahnihah Benevento leh Torino te lak aṭangin point khat chauh an hlawh chhuak.
Old Lady manager Pirlo chuan, "Coach nih bul ṭanna season a ni a, thil a awlsam lo ngei mai. Thil tihsual tam tak ka nei a, vawi lehkhata siamṭhat nghal vek theih lah a ni hek lo, zawimuang chuan hma kan sawn ve zel chuan ka hria.
"Mitinin tihsual kan nei thei vek, keimah chauh ni loin midang pawhin tihsual an nei thei. Tih sualna ngaia tisual nawn lo turin kan inzir zel ang," a ti. Juve player senior ṭhenkhat chuan palina nih phak chu an thil tum a nih thu an lo sawi hial tawh.
Turin club thuneitu lam chuan season tharah pawh Pirlo hi an chhawr chhunzawm tur thu an tichiang tawh a, kumin aia hmasawn erawh an duh ngei ang. Kuminah Serie A title an hloh a nih pawhin, league nomawi laklet bakah UCL lak belh an duh dawn.
