Championship-ah Covid-19 kai 10 an awm

Premier League hnuai inelna Championship club-in Covid-19 test an neih hnuhnung ber result tihchhuah a ni a, Championship club pariat aṭangin Covid-19 kai mi 10 hmuchhuah an ni. 

Covid-19 test hi a inchhawkin neih a ni a, test hnuhnung ber hi Ningani leh Zirtawpni khan neih niin mi 1,058 chuan test hi an hmachhawn. Preston North End chuan thuchhuah siamin an striker Jayden Stockley chu Covid-19 kai zingah hian a tel thu an sawi. 

Coronavirus an kai tih hmuhchhuah ho hi khunghran nghal an ni a, Championship club zingah Middlesbrough, Fulham leh Cardiff chuan Covid-19 kai zingah hian pakhat ṭheuh positive an neih thu an puang tawh. 

League Two aṭangin club pali leh mi 135 chuan test an nei ve leh tawh bawk a, mi pasarih chuan Covid-19 an kai tih hmuhchhuah a ni - club palite hi Exeter, Cheltenham, Colchester leh Northampton an ni a, club pali hi playoff khel thei dinhmuna ding vek an ni. 

Colchester chuan an club aṭangin mi pali an positive thu an sawi a, Northampton chuan an physiotherapist Ignacio Herrando chuan Covid-19 a kai thu a sawi a, Exeter-in pahnih an nei a, Cheltenham-ah positive an awm miah lo thung. 

Championship bikah chuan tuna test hnuhnung ber neih hmaa test-ah Blackburn captain Elliott Bennett leh Fulham player pahnih an hming tarlan loh chuan Covid-19 an kai tih hmuhchhuah a ni a, test hmasa berah Hull City chhungkuaa mi pahnih an positive thu sawi a ni bawk.