Nets tan Durant a lo kir leh ta

Hliam vanga hun rei tak a chawlh hnuah Kevin Durant a inkhel thei leh tawh a, nimin zing khan point 17 rawn nei nghalin Brooklyn Nets chu New Orleans Pelicans lakah 139-111 in hnehna a chanpui.

Durant hi a chawlh rei avangin chhawr rim a la ni lo, quarter hnihna aṭangin inlan chauh mah se a thiamzia hmuh hmaih theih a ni chuang lo. Mawi tak maia 3 point ṭum hnih a vawm luhte chu Nets ṭantute tan hmuhnawm a tling ngei ang.

Kum 32 mi Durant chuan, "Match 23 chhung zet khel thei loa awm kha a hrehawm hle, court chhunga inlan leh theih tak chu thil nuam leh hlimawm a tling. Team ka pui thei kha ka lawm bawk," tiin a sawi.

Inkhel dangah Western Conference champion nih tum pahnih an inhmachhawn a, hmahruaitu Utah Jazz chu an hnuai chiaha awm Phoenix Suns nen overtime an khelh hnuah 117-113 in an chak lo.

Suns tan Devin Booker-a'n point 35 a neih bakah point 29 neitu Chris Paul-te an che ṭha. Jazz player ṭha Donovan Mitchell chuan point 41 ngawt nei thei mah se thlawptu a nei ṭha tawk lo a, inkhel inhnehtawk takah a vanduai zawk an ni.