Porto ngamtu Chelsea boruak a ṭha leh ta

Chelsea chuan kar liam taa an chunga thil thleng duhawm lote an theihnghilh leh tawh tih khelmualah an lantir - Nilaini zan khan Champions League quarterfinal first leg-ah Porto chu 2-0 in an hneh a, semifinal lut turin an dinhmun a ṭha ta hle.

Chelsea hi Premier League-a West Brom laka an mualpho hnuin training-naah Kepa Arrizabalaga leh Antonio Rudiger an intibuai zui a, an boruak a duhawm lo takzet.

Mahse, London club hian Seville khawpuia inkhelah an buaina an theihnghilh tawh tih pholangin goal hnih an khung a, Mason Mount leh Ben Chilwell-ten goal khat ve ve an khung.

Premier League-a pangana ni mek Chelsea hian April 10 zanah Crystal Palace nen league match an khel dawn a, April 13 zanah Porto nen quarterfinal second leg an khel zui ang - Primeira Liga lama pahnihna ni mek Porto hian Chelsea hmachhawn hmain April 10 zanah vek Tondela chu league match khel turin an lenchilh dawn thung.

Buaina, lo kiang rawh...
April 3 zan khan Chelsea-in Premier League-ah relegation zone-a awm West Brom chu 5-2 in an ngam lo a, German coach Thomas Tuchel-a hnuaia an tlawmna hmasa ber a ni.

Season thara Champions League khelh tum Chelsea boruak a fuh hleithei lo. Pathianni khan training ground-ah buaina an nei zui a, defender Antonio Rudiger leh keeper Kepa Arrizabalaga-te an inti buai!

Tuchel-a'n player pahnihin an buaina an chinfel nghal avangin hrem an nih loh tur thu a sawi a, a hrem lo mai ni loin Rudiger hi bul ṭantir a ni - German coach-in Baggies laka mualpho player aṭangin player panga ngawt a siksawi.

Chelsea-in an buaina an hnuchhawn tawh tih pholangin minute 32-naah goal hmahruai an khung nghal a, Mount chuan Jorginho ball pek chu mawi taka a virpui hnuah hmahruaina goal ni turin a khung.

Chance nei ve ve
Porto hi Champions League last 16 aṭanga Juventus pet chhuaktu an ni a, dah hniam theih an ni lo - Blues lakah pawh shot an ngah zawk a, mahse, an vanneih zan erawh a ni lo thung.

Portuguese champion hian vawi 12 ngawt 'shot' an nei a, heng zinga panga hi goal zawnah a kal - Moussa Marega leh Pepe-te khung tur nia lang Edouard Mendy-a'n a dansak leh Luis Diaz hun khawhralte chu Porto tan uiawm zual a ni.

Porto tana Corona khung tur nia lang Blues captain Cesar Azpilicueta-a'n a 'block' chu a ṭha takzet a, hetihrual hian Blues hian chance an hlah ve nual tho bawk.

Bench aṭanga luhtir Christian Pulisic chuan 'bar' a tih per a, Timo Werner leh Azpilicueta-ten goal khungna remchang an neih chu an chhawr ṭangkai thei bik lo.

A la tawk lo
Chelsea-in goal khat tal an khung belh leh chuan an hah a dam dawn tih an hria a, an tha an thlahdul duh lo. English club hian hun tawp nan minute nga chiah a awm tawh tihin an goal hnihna an khung.

Inkhel tawp nan minute nga chauh a awm tawh tihah Chilwell hian penalty area-ah ball a um lut a, Porto keeper Agustín Marchesín-a bum hnuah goal ruakah a khung a, dinhmun himah Chelsea a hlangkai.

Chelsea leh Porto hi United Kingdom leh Portugal-a Covid-19 dan avangin an inzinpawh thei rih lo a, hei vang hian Sevilla khelmual Ramon Sanchez Pizjuan Stadium-ah an inkhel.

Nilaini zana team pahnih inkhel hi Chelsea tan 'away' a ni a, goal hnih an khung hi a hlu lehzual - April 13 zana second leg an khelh leh hunah Blues hi 'home team' an ni ve tawh thung ang.

A hming Mount
Frank Lampard-a'n Mason Mount chunga rinna a nghah lai khan duhsakna vanga ngai tam tak an awm a, top flight football la khel tam lo Mount chungah mipuiin rinna nghah an harsat.

Mahse, Tuchel-a'n Blues-a enkawl hnuah pawh English midfielder hian hmun pawimawh a chan chhunzawm avangin duhsakna vang maia Chelsea tana khel a ni lo tih chu a lan chhunzawm zel.

Porto laka goal khung tura a vir dan a mawi a, a finishing a tawih em em bawk. January 26-a Tuchel-a'n Chelsea a pan hnuah Blues tan ani aia goal khung hnem an awm lo a, goal nga a khung tawh.

Blues tan tun season inelna hrang hrangah match 41 khelin goal riat a khung a, assist vawi ruk a nei. Kum 22 mi midfielder hian tun season-ah club leh ram tan Premier League, Nations League, FA Cup, World Cup qualifying leh Champions League-ah te goal-a khung ta.

Inkhel Chhehvel
• February-a Atletico Madrid an hneh tawh bawk avangin Chelsea-in Porto an hneh khan kum 2004 hnua Champions League khualmuala a zawna an chak lehna hmasa ber a ni a, April 2004 khan Claudio Ranieri hnuaiah away game-ah a zawnin an lo chak tawh.
• Chelsea leh Manchester City-ten goal hnih chiah la chhuahin clean sheet vawi sarih ve ve an nei a, tun season Champions League-a record nei ṭha ber an ni.
• Tuchel-a'n January-a Chelsea-a enkawl hnuah Edouard Mendy (10 clean sheet) aia European top five league-a goal chhuah lohna match nei tam an awm lo.
• March 2012 (vs Napoli - John Terry & Frank Lampard) hnua a vawi khat nan Chelsea tan English player pahnihin Champions League match khatah goal an khung.
• April 2014 khan Manchester United legend Ryan Giggs chuan kum 40 leh ni 123 mi niin Red Devils tan Champions League quarterfinal a khel a, Giggs hnua CL quarterfinal-a inlan thei upa ber chu kum 38 leh ni 40 mi, Porto defender Pepe kha a ni.
• Club leh ram tana a match hnuhnung palia goal thum khungtu Mason Mount-a goal kha Champions League-a a khung hmasak ber a ni.