Match hnih atan Neymar an hrem

Paris Saint-Germain forward Neymar chu Lille nen an inkhelh ṭuma hnawhchhuah a nih vangin match hnih chhung an hrem. French champion tan chuan season pawimawh laia player ṭha an chan tur hi chanchin lawmawm loh a ni ang.

PSG hi Ligue 1 match an khelh hnuhnung berah khan Lille lakah 1-0 in an tlawm, an chak loh ṭum hian Neymar-a'n khelmual pawnah Portuguese defender Tiago Djalo a nem lui a, player pahnih hi intibuai zuiin hnawhchhuah ve ve an ni.

Yellow card pahnih hmuh vanga hnawhchhuah chu match khat atan chauh hrem an ni ṭhin. Mahse, Neymar hian ṭul lo takin an khingpui lakah kut a thawh avangin French Football Federation chuan hrem a nihna hi a tipung.

French champion hi league table-ah Lille hnuaiah an awm mek a, nomawi humhim tur chuan chetsual a thiang tawh lo. Neymar hian hrem vangin Strasbourg leh Saint-Etienne a hmachhawn thei dawn lo, a lo kir leh meuh chuan league match khelh hmabak panga chauh an nei tawh dawn.