French Open khelh hun an sawn

'A hun an sawn mai thei' tih thawm a awm hnu lawkah French Open 2021 khelh hun sawn a nih thu puan zui a ni. Roland Garros chu nikum ang bawkin hripui vangin a hun pangngaiah khelh theih a ni dawn lo.

Tournament hi a hun pangngai aiin kar khata sawn tlai a ni a, May 30 aṭanga June 13 thleng an khel ang. Inelna tak an neih hma karah qualifying round khelh hmasak a ngai bawk ang. A hun sawn avang hian grass court season tir lam a nghawng ang.

France ram hi a vawi thum an an inkharkhip a, president Emmanuel Macron chuan hri leng vanga an inkharkhip hi May thla tawp lamah a tawp hman mai tura an beisei thu a sawi a, hei vang hian French Tennis Federation (FFT) chuan thutlukna hi an lo siam a ni.

FFT president Gilles Moretton chuan, "Sorkar lam thuneitu, hriselna lama hna thawktu, sumdawnna lama kan thawhpui leh ATP bakah WTA lam thuneitute hriatpuinain 2021 Roland Garros tournament chu kar khatin kan sawn tlai a ngai dawn.

"Tournament hi a hmuna entu awm lo chuan boruak a nuam tawk lo, nikum ang bawkin kuminah hian Roland Garros hi fans lamin an en theih ngei tura chhawpchhuah kan tum. Hriselna kan ngaih pawimawh rual chiahin fans pawh an pawimawh," tiin a sawi.

Season hmasa khan French Open hi hri leng vang bawkin an lo sawn tawh. May thlaa khelh ṭhin kha September-ah an khel daih a, a hmunah entu an awm thei a, nikuma an tih tawh ang bawk hi kuminah an beisei leh niin a lang.

Nikum khan Rafael Nadal-a'n a vawi 13 nan Paris khawpuiah hlawhtlinna a chang a, kuminah pawh rinkai ber a ni leh dawn. Hmeichhe inelna lamah tleirawl Iga Swiatek chuan a hmuna entu 1,000 hmaah a Grand Slam title hmasa ber a la a ni.

British rama tennis thuneitu sang Lawn Tennis Association chuan clay court inelna lian hian grass court season-a nghawng dawn tih an sawi a, hei vang hian Wimbledon inbuatsaihna tournament ṭhenkhat chu tih danglam a ngai mai thei tih an sawi ve nghal bawk.