Mizoram Football Association-in Football leh futsal season titawp

Mizoram Football Association chuan tunlaia hripui leng coronavirus vangin 2019-2020 season-a a la khelh zawh loh inelna zawng zawng a titawp a, football leh futsal khelh hmabakte khelh a ni dawn lo. 

MFA hian thutawp siam turin May 30, Inrinni khan Office Bearer’s meeting an nei a, he mi ni vek hian thuchhuah siam nghalin inelna chhunzawm theih a nih loh chu pawi an tih thu an tarlang tel bawk.

MFA thuchhuahah hian an hnuaia awm Aizawl DFA inelna kalpui mek NECS Cup 2020 a huam lo.

Aizawl DFA hian kumin March thla khan veng leh khua football hmanga inelna NECS Cup an buatsaih ṭan a, second round khelh laiin Covid-19 vangin chhunzawm theih a ni lo. Aizawl DFA hruaitute chuan inkhelh phal a nih hun remchang hmasa berah NECS Cup hi khelh chhunzawm an tum thu Vanglaini an hrilh.

MFA chuan, "MFA season kal mek, 2019-2020 chu dan angin May 31, 2020-ah tihtawp a ni a. MFA calendar-a dah sa competition pawimawh ṭhenkhatte chu Covid-19 hri leng avangin khelh a remchang thei ta lo a, MFA chuan pawi a ti takzet a ni," tiin thuchhuah an siam.

FIFA hnuaia football season hi May 31-ah a tawp hrim hrim a, Covid-19 vanga inelna chhunzawm theih a nih loh avangin Europe lamah erawh ram ṭhenkhatah pawhsei a ni a, ram 

ṭhenkhatah tihtawp a ni.

India ramah chuan natna hri hlauhawm Covid-19 avangin AIFF-in tun season inelna hmabak a titawp tawh a, MFA thutlukna a danglam lo.

Inelna hmabak Saitual-a nghah tur MFA Cup, Mamit DFA thlen tur Inter District MFA Sub Junior Boys Championship, Siaha DFA thlen tur Inter District Women's Championship bakah MFA Women's League, MFA Futsal League leh MFA hnuaia futsal tournament dangte chu Covid-19 hri leng avangin 2019-2020 season chhungin kalpui theih a ni lo a, tihtawp a ni.

MFA season thar 2020-21 chu June 1, 2020 hian dan pangngai angin a inṭan ang a, nimahsela football inelna (competition) erawh chu sorkarin a phal hma chu kalpui a ni dawn lo.

Club affiliation leh player’s registration & transfer chu AIFF thu ngaichang chungin MFA Executive Committee-in a rel ang.

MFA chuan 2019-2020 season-a MFA Executive Committee Member leh Committee peng hrang hrang member-te chu 2020-2021 ah an chanvo ngai chelh nawn leh ṭheuh turin a ruat nghal a; DFA OB-te’n ṭha an tih angin season thara a thawhpui tur a ruat thei ang.

May 31, 2019-a MFA Annual General Body Meeting-in a rel tawh angin MFA-in DFA-te ṭanpuina turin DFA pariat hnenah Rs 20,000 ṭheuh a pe ang a, a vaiin Rs 1,60,000 a ni.

MFA Constitution-a inziak angin Annual General Body Meeting chu May 31 ral hmaa neih tura tih ni mah se, Covid-19 hri leng avangin neih theih a ni lo a, MFA OB meeting chuan a remchang hmasa berah ‘Special General Body Meeting’ nei turin thutlukna an siam.

MFA-in Grassroots football a kalpui mek chu season tawp rualin tihtawp a ni a; amaherawhchu Grassroots football kal laite'n an zawh hman loh chu Covid-19 hri leng a zawh hunah kal chhunzawm dan ngaihtuah a ni ang.

•    MFA-in a hnuaia inelna a titawp

•    Inelna tihtawp langsar zualte

    a) MFA Cup (Saitual-a nghah tur)

    b) Inter District MFA Sub Junior Boys C'ship (Mamit DFA thlen tur)

    c) Inter District Women's C'ship (Siaha DFA thlen tur)

    d) MFA Women's League

    e) MFA Futsal League

•    ADFA buatsaih NECS Cup a tel lo.

•    NECS Cup chawlh lailawk chu khelh chhunzawm tum a ni