June 11-ah La Liga khel dawn
Infiamna khawvel ngainatute tan chanchin hriat tur lawmawm a awm belh zel a, European top flight league zinga ngaihven hlawh La Liga chu June 11 khian khelh ṭan leh tura tih a ni.
Spain-ah hian March 12 aṭang khan Covid-19 vangin football inelna zawng zawng tihtawp a ni a, mahse Spain prime minister Pedro Sanchez chuan thuchhuah thar siamin June 8 aṭanga a inkhelh ṭan leh theih tur thu a sawi.
Sevilla derby
La Liga lam ruahmanna ang chuan June 11-ah hian Seville khawpui derby-a bul ṭan tur a ni a, Real Betis leh Sevilla-te an inkhel ang. Nitin league match khelh tura ruahman a ni a, Covid-19 darh zel dan a zirin July 19-ah chuan league khelh zawh hman beisei a ni.
Europe-a tualchhung league-te khelh zawh a nih hnuah European football-a inelna chu neih ṭan leh tum a ni a, hei vang hian La Liga hi khelh zawh vat tum a ni - Premier League pawh July 25-ah khelh zawh an tum.
September-ah season thar
La Liga hian an ruahman dan chuan September 12-a season thar ṭan a ni a, hei pawh hi a theih kher ang em tih chu zawhna chhan harsa tak a ni. La Liga president Javier Tebas chuan, "Season kan zawh theih hun tur hi ngaihtuah ber tur chu a ni a, kan lawm tak tak hun tur pawh season kan ṭan theih hunah chauh a ni ang.
"Pathianin rem a tih chuan September 12-ah season thar ṭan theih kan beisei a, he hun thim tak hi kan paltlang theih hram kan beisei a ni," tiin a sawi.
Entu awm lo
La Liga hi league dang ang thoin entu awm loa khelh a ngai dawn a, mahse in lama lo entu tan mipui thawm awm leh awm loa en theih dan tur ruahmanna siam a ni.
Ruahman dan chuan inkhelh lai hian fans awm angin Tv lama entute tan chuan thawm siam a ni dawn a, mahse hei erawh duhthlan tur a ni - fan-te hian an duh chuan inkhel tak taka thawm awm miah lo angin an thlang thei ang a, thawm awm loin an en thei ang.
Tun dinhmun
La Liga club-te hian kar hmasa aṭang khan training an nei ṭan tawh a, mahse an training neih danah hian player 10 aia tam awm khawm phal a ni lo. June 11-a league khelh ṭan tum a nih takah chuan training pangngai nei thei tura hmalak chu La Liga tan hmalakna hmasa tur a ni ang.
Barcelona chuan table chung ber luah mekin hmahruaitu an ni a, match 11 khelh tur la awmah an hnuai chiaha awm Real Madrid aia an sanna chu point hnih a ni - La Liga a la hmuhnawm dawn chauh!