Liverpool tan neutral venue-ah nomawi

June 17-a Premier League khelh chhunzawm turin hmalak zel a ni a, hetiang boruak karah hian champion chiang tur anga sawi theih Liverpool chuan 'neutral venue'-ah league nomawi an chawi a ngai dawn niin a lang. 

Kum 30 hnua a vawi khat nana league champion nih beisei Liverpool hian Premier League table-ah point 25-in hma an hruai fal mek a, champion tura match hnih chak chiah mamawh tawhin an hmelma kumhlun Everton muala nomawi chawi theihna remchang an nei. 

Mahse, football match-a venhimna lam kalpuitu hotu deputy chief constable Mark Robert chuan match khelhna tur khawpuia tualchhung police-te ngenna angin match ruk vel chu ṭantu awm lohna hmunah khelhtir a nih tur thu a sawi. 

Mark Robert-a'n ṭantu awm loa inkhel tur match a tarlan paruk zingah Merseyside derby a tel a, Reds hian neutral venue-ah nomawi an chawi ngei a ngai dawn niin a lan phah - Merseyside derby-ah hian lo chak lo ta pawh ni se nomawi an chawi theihna match apiang chu neutral venue-a khelhtir tura rawtna a awm. 

Roberts chuan, "Police force mamawh tam loa thil kalpui dan kan ngaihtuah a, match tam zawk chu home & away anga kalpui a nih dawn laiin ṭhenkhat erawh neutral venue-a khelh a ngai dawn thung niin a lang. 

"Chutihrualin heng hi chu rawtna chauh a la ni a, thutlukna siam a la ni lo. Kan ngaih pawimawh ber chu mipui vantlang himna a ni a, fan-ten dan awm sa an zah a, stadium pawna an punkhawm loh a pawimawh bawk ang," a ti. 

Hetihlai hian Merseyside Police chuan Everton leh Liverpool-te Goodison Park-ah inkhelhtir an duh a nih chuan an hnial loh tur thu an sawi a, venhimna lamah theihtawp an chhuah tur thu an sawi bawk. 

Assistant chief constable Rob Carden chuan, "Mipui vantlang himna leh hriselna hi chu Government and Public Health England thutlukna siam tur a ni a, a tawpa a pawm theitu chu Liverpool City Council kaihhruaina hnuaia Safety Advisory Group an ni ang," a ti a, an kutah thutlukna a awm loh thu a sawi. 

Nimin khan UK Secretary of State for Digital, Culture, Media and Sport Oliver Dowden chuan Carden-a thusawi ṭawmpuiin Safety Advisory Group-ah engkim a awm thu a sawi a, SAG hian an khawpuia mipui tam zawk duhdan lo ang taka thutlukna an siam a rinawm loh - Liverpool fans tan Dowden-a thusawi hi ngaihthlak nuam a ni.