Pro Fight a hmuhnawm

Yodha 4x4 Pickup LPS Pro Fight chu Nilaini zan khan R. Deng-

ṭhuama Indoor Stadium, Mualpuiah quarterfinal khelh chhunzawm a ni a, inhnek paruk awmin mipuiin an hlut tawh hle - zaninah a hmun ngaiah quarterfinal khelh chhunzawm a ni ang.

Lightfly inhnek ngaihven hlawh takah Arunachal Pradesh tana national championship vawi thum khel tawh Heli Tana Tara chuan a thiamna ṭha tak lantirin C Zosangmawia lakah round nga la fai vekin unanimous decision-in a chak. Kum 20 mi Tana Tara hian semifinal a lut a, Arunachal Pradesh aṭanga boxer tel pathum zinga thleng sang ber a ni.

Bantamweight huangah Laldinliana chuan Arunachal Pradesh boxer pakhat zawk Kogam Potom a ngam hle. Tuipui boxer hi round tinah a chungnung vek a, Arunachal champion vawi hnih ni tawh lakah zahngaihna lantir loin hnehna a chang.

Weight hrang pahniha champion nih a tumna kawngah Abel Lalawmawia'n rahbi a tuk sang zel a, Lalṭanpuia Renthlei lakah hnek chhuak tam leh bei ngawrh zawk a nihna chhawrin unanimous decision-in a chak.

Serchhip chhuanvawr Abel-a hian round tinah a hnek chhuak tam zawk hle vek a, Hnahthial boxer Ṭanpuia a inveng phui hle thung. Kum 32 mi Abela hian lang tham khawpa hnek nei tam lo mah se Ṭanpuia taksaah a hnek tam a, a bekah vai fuhin a kut karah a hnek tlang fo bawk.

26 Assam Rifle boxer Abel-a hi tun hmain lightheavy-ah vawi li a champion tawh a, middle huangah a vawi hnih inlanna niin hlawhtling tur erawh chuan hmabak hautak a la hmachhawn chho dawn a ni.

Zanin Inhnek Tur
Lightfly
F Lalmuanzuala, Sihphir vs Zorammuana, Tuipui
Bantam
Yuri Lalbiakdika Sanate, Vaitin vs W Alexander Meitei, Manipur
Light
Lalruatkima, Model Veng vs Lalnunzawma, Bualpui NG
Middle
Lallawmkima Sailo, Chaltlang Lily Veng vs K Lalpianglawma, Sihtlangpui
KH Sanamacha Singh, Manipur vs H Lalrinhlua, Hnahthial
Nilani zan Results
Lightfly
Heli Tana Tara, Arunachal Pradesh bt C Zosangmawia, Chaltlang
Unanimous Decision (50-45, 50-45, 50-45)
F Zoramchhana, Cherhlun bt H Lalnunhlima, Tuipui
Unanimous Decision (48-47, 48-47, 50-45)
Bantam
Laldingliana, Tuipui bt Kogam Potom, Arunachal Pradesh
Unanimous Decision (50-45, 50-45 49-46)
Lalrinsanga Tlau, Khawruhlian bt Lalremsanga, Lungleng I
Unanimous Decision (50-44, 50-44, 50-44)
Light
Vanlalawmpuia, Khuangthing bt C Lalhruaitluanga, Mualpui, ITI
Technical Knockout (Round 1, second 1 - kut hliam vangin Hruaitluanga'n a khel thei lo)
Middle
Abel Lalawmawia, Serchhip bt Lalṭanpuia Renthlei, Hnahthial
Unanimous Decision (50-45, 48-47, 48-47)
GIG Motors Fighter of the Night : Laldingliana, Tuipui