Dubai-ah vawi 50 nan Federer a chak

Roger Federer chuan Dubai Tennis Championship bika a match 50 chak ni hmel a hmu ta a, hetihlai hian champion lai Roberto Bautista Agu leh seeded pakhatna Kei Nishikori erawh an tum ram thleng zo loin an tla thung.

Nilaini zan inkhelah Grand Slam vawi 20 champion tawh Federer hian Fernando Verdasco chu 6-3, 3-6, 6-3 a hnehin quarterfinal a inhlangkai - semifinal lut tur chuan world number 35 Marton Fucsovics a paltlang leh a ngai dawn a ni. Fucsovics hian inkhel dangah Jan-Lennard Struff chu 6-4, 6-2 in a lo hneh ve thung.

Kum 37 mi Federer hian tennis a khelh hun chhungin nomawi 99 a chawi tawh a, Dubai Tennis Championship-ah hian a vawi riat nan hlawhtlinna a chang thei a nih chuan a tan mellung pawimawh leh hlu bik a ni ang.