Mizo tlangval hmangin Aizawl FC an comeback
Kerala-ah Aizawl FC chuan hun tawp hmaa Paul Ramfangzauva, Lakhawpuimawia leh Ansumana Kromah goal hmangin Gokulam Kerala chu 3-1 in an lehthal a, Mizo club-in season tharah I League an khel zel dawn.
Inkhel dangah East Bengal chuan Real Kashmir 2-1 in an hneh a, Kolkata club dang inkhelah Mohun Bagan chuan Indian Arrows 1-3 in an hneh lo.
Harhtharna
Aizawl FC-in coach thar Standly Rozario hnuaiah hmasawnna an nei a, hun tawp thlengin an theihna zawng zawngin an khel a, chak loh an hreh takzet. Mizo club hian Gokulam an hmachhawn hma hian player 10-a khel chungin East Bengal chu Salt Lake-ah an chelh thei a, relegate pumpelh turin point thum chiah an mamawh tawh.
EMS Stadium-ah Gokulam-in Marcus Joseph hmangin minute 9-na lekah an khung a, Aizawl FC-in siphurh sut an harsat. Mizo club-in beiseina an nei tlat rah an seng a, minute 83-naah Paul-a hmangin siphurh an sut.
Point khatah AFC an lungawi lo a, Mapuia hmangin minute 88-naah hma an hruai a, injury time-ah Kromah-a'n chak nemnghetna goal a khung. Aizawl FC hian an khelh hmabak match hnihah chak tawh lo pawh ni se table mawngphaha awm Shillong Lajong-in an umpha thei tawh lo.
Aizawl FC hian March 4, Thawhṭanni tlai 2:00-ah Shillong Lajong nen RG Stadium, Mualpuiah NorthEast Derby an khel ang.
Beisei nei East Bengal
India leh Pakistan buaina avangin Real Kashmir-in an mualah East Bengal an mikhual thei lo a, Delhi-a inkhelah Kolkata club tan Enrique Esqueda (20') leh Jaime Santos (43') hmangin hnehna an chang. Kashmir player Abednego Tetteh chu minute 28-naah hnawhchhuah a ni a, player 10-a khel chungin minute 67-naah Aaron Katebe penalty hmangin an siphurh an sut ṭhen a, goal dang hmuh tur a awm zui lo.
Red and Gold hian point thum an hmuh zarah hmahruaitu Chennai City chu point li chauhin an pha lo a, amaherawhchu match hnih chiah khelh tur a awm tawh avangin East Bengal tan beisei han tihsan viau a rem tawh lo.