Sharapova leh Del Potro an damlo

Maria Sharapova chuan a dar hliam vangin March thlaa khelh tur Miami Open-ah a inlan theih loh tur thu a ti chiang a, Juan Martin del Potro pawhin karleha khelh tur leh nomawi a kawl mekna ni bawk Indian Wells-ah a khup hliam vangin a inlan loh tur thu a sawi chiang ve bawk.

Grand Slam vawi nga champion tawh Sharapova hian nikum nipui lai aṭang khan a dar na hi a buaipui tawh, January thla khan St. Petersburg Ladies' Trophy aṭanga a inhnuhdawh tawh bakah thla leha khelh tur BNP Paribas Open-ah pawh a inlan dawn lo chiang tawh bawk a ni.

Kum 31 mi Sharapova chuan, "Tennis court chhungah a ṭha thei ang bera inkhelh leh theih hun ka nghakhlel hle. Hliam nei loa inkhelh ka chak a, nikum US Open hnu lamah kha chuan dam chiang ver vawrin ka la inkhel meuh lo a ni," tiin a taksa a fit tawk loh thu a sawi.

Hliam a neih ngun vanga a nih tur ang ni phak loa ngaih Del Potro pawh a khup a la dam thei lo a, nikum October thla hnua a tournament hmasa ber ni turin kar hmasa khan Delray Beach Open-ah inlan mah se tun dinhmunah a la inkhel zui thei leh rih tawh lo.

Argentine tlangval Del Potro chuan, "Pang­ngai taka inkhel leh tur chuan ka nghah rih a ngai, tunah chuan dawhthei takin dam ver vawra ka training theih hun ka nghah a ngai a ni," tiin a sawi.