Dr T. Ao U21 Football-ah Mizoram champion
2nd Dr T. Ao North East International NEC Gold Cup Under 21 Football Championship-ah Mizoram chuan nizan khan final-ah Meghalaya hnehin an champion. Ngopa rawlthar F. Lalnuntluanga chu best player atan thlan a ni a, Bairabi rawlthar Flavius Lalruatkima chu man of the final atan thlan a ni.
SAI Ground, Guwahati-a final inhnehtawk takah hian Mizoram tan F. Lalnuntluanga chuan minute 27-naah hmahruaina goal a khung a, Meghalaya-in minute 69-naah penalty hmangin siphurh an sut. Hun pangngaiah 1-1 in an inhnehtawk a, penalty shootout-ah Mizoram hian 3-1 in hnehna an chang.
February thla liam ta khan Meghalaya senior team-in Santosh Trophy Qualifying Round-ah Mizoram chu Lammualah an hneh a, hei vang hian tun ṭuma Dr T. Ao Football inelna hi Under 21 ni mah se Mizoten an ngaihven leh zual. Group stage-ah team pahnih hi 3-3 in an inhnehtawk a, final-ah pawh la intluk thoin hun pangngaiah 1-1 a ni a, penalty shootout-ah Mizoram hi an vannei ta a ni.
Mizoram team-a player tam zawk hi Khelo India Under 21-a gold medal latute kha an ni a, final-ah keeper Lalrinnunga'n ṭum hnih penalty a dan avangin Kerala an hneh. Tun ṭumah pawh hian Khawhai tlangval Nunga hi chhandamtu a ni a, penalty vawi hnih a dan bakah vawi khat dang an pet over.
Penalty Shootout-ah Mizoram tan Saitual rawlthar PC Lalhriatpuia'n penalty hi khung mah se Vanlalnghenga'n a vawi hnihnaah a pet goal lo. Hemi hnu hian Tluangtea leh Republic Veng rawlthar Lalmuanawma ten an pet goal a, 3-1 in hnehna an chang. Guwahati-a Mizo awmten Mizoram team an ṭawiawm ṭha a, penalty shootout-a hnehna an chan theihna kawngah pawh Mizo mipui an thawh hlawk hle.
Mizoram coach Vanlalpeka Ralte chuan, "Mizo mipui min ṭawiawmna avangin kan lawm takzet. Meghalaya coach-in kan khelh dan a zir uluk a, an chet ṭhat ber ṭum a ni hial ang. Amaherawhchu ka naute pawhin huaisen takin an khel a, a tawpah kan vannei ta zawk. Kan champion hi MFA, coaching staff, player-te leh Mizo mipui ṭawiawmna ṭhat zar liau liau a ni," tiin Vanglaini a hrilh.
Mizoram team hi manager Peter Lalzawmliana, coach Vanlalpeka Ralte, asst coach Timothy Vanlalchhuanga Ngente leh asst manager NC Hmingthanzuala ten an enkawl a ni.
Mizoram CHAMPION Kalkawng
Group Stage
February 21, Ningani
Mizoram 1 - 0 Manipur
MIZ : F. Lalnuntluanga 17'
MoM : F. Lalnuntluanga, Mizoram
February 21, Ningani
Meghalaya 3 - 3 Mizoram
MIZ : Lalremruata 45'; F.Lalnuntluanga 50';
David Laltlansanga 72'
MoM : F. Lalnuntluanga, Mizoram
February 23, Inrinni
Mizoram 4 - 1 Nagaland
MIZ : PC Lalhriatpuia 4'; Lalremruata 7';
PC Lalhriatpuia 46'; K. Roluahpuia 64'
MoM : Vanlalnghenga, Mizoram
February 24, Pathianni
Nepal 0 - 3 Mizoram
MIZ : F. Lalnuntluanga 42' (P);
PC Lalhriatpuia 56'(P); K.Roluahpuia 90+6'
MoM : F. Lalnuntluanga, Mizoram
February 25, Thawhṭanni
Mizoram 4 - 0 Tripura
MIZ : Lalremruata 16'; Lalbiaknia Royte 72';
Lalmawizuala 90+1' (P); PC Lalhriatpuia 90+2'
MoM : Lalremruata, Mizoram
Semi Final - February 27, Nilaini
Mizoram 5 - 0 Arunachal Pradesh
MIZ : F. Lalnuntluanga 17'; PC Lalhriatpuia 45+1', 73'; Flavius Lalruatkima 50'; Lalremruata 84'
MoM : Lalremruata, Mizoram
Final - February 28, Ningani
Mizoram 1 - 1 Meghalaya
MIZ : F. Lalnuntluanga 27'
*Penalty shootout ah Mizoram 3-1 in an chak
MoM : Flavius Lalruatkima, Mizoram
Lawmman
Winner Mizoram - Rs 8,00,000
Runners Up Meghalaya - Rs 4,00,000
Third/4th Place Arunachal/
Sikkim - Rs 1,00,000
Best Player - F. Lalnuntluanga Rs 25,000
Best Keeper - Frolikson, Meghalaya Rs 10,000
Top Scorer - Aru Binod, Arunachal Rs. 10,000