Zanin aṭangin Mizoram pachak zawnna

1st March, 2019

Mizoram chhunga pachak ber zawnna chu zanin dar 8:00 aṭang hian Hawla Auditorium-ah neih ṭan a ni dawn a, inelna hmasa ber atan 'Buklung in char kan siak (Dumbell Overhead Press)' hmanga intihsiak tur a ni dawn - Zonet Zawlbuk leh Zonet HD-ah live a ni ang.

Inelna hmachhawn tur hian Mizoram hmun hrang hranga palian leh chak 'kei ka ni' inti ṭhah 15 an inziak lut a, an zinga mi paruk chu 100kg an tling. Lalhriatrenga (135kg) chu a rit ber niin, feet 5 leh 11 inches Zomuana chu a sang ber.

Mizoram pachak zawnna hi chi hrang hrang 13 hmanga inelna tur a ni dawn a, March 30-ah zawh tura ruahman a ni. Items zawng zawng zawh hunah point inang hmu an awm a nih chuan judge-te remtihnain item pakhatah emaw a aia tamah emaw an point intlukna emaw an intluk teuhna berah an intihsiak ang.

Zanina an inelna tur bik Buklung in char kan siak (Dumbell Overhead Press) ah hian, dumbell 50kg chhuat aṭanga la kangin kut khinghnihin koki thleng an la kang ang a; chumi hnuah lu chungah ban pakhatin mar takin an nawr (press) chho tur a ni.

Judge in dah thlak tur a tih hma chuan dah thlak phal a ni lo. Vawi khat dik thlapa an nawr (press) hnuah leiah an dah thla leh ang a, a bul atangin an ṭan ṭha leh zel ang.

Pachak zawnna a inelna turte:
# Inelna A hun
1 Buklung in char kan tam siak (Dumbbell overhead press) 1 March, Zirtawpni
2 JCB ke namleh 5 March, Thawhlehni
3 Bungrua truck body a inhlan kai siak 5 March, Thawhlehni
4 Rit khai chunga intlansiak (Farmer`s walk) 8 March, Zirtawpni
5 Lungtum inhlankai siak (Atlas stone) 8 March, Zirtawpni
6 Motor hnuh kal (Fire dept. Truck) 12 March, Thawhlehni
7 Balu ip (Sand bag) inthiarsiak 15 March, Zirtawpni
8 Motor ke hnungzawng a invawrh siak 15 March, Zirtawpni
9 Truck pawh kal (Zothan auto works- 909) 19 March, Thawhlehni
10 Lei aṭanga motor inchawi kan tam siak (Deadlift) 19 March, Thawhlehni
11 Koki a rit pu chunga ṭhutpui a dinpui (Squat) 22 March, Zirtawpni
12 Weight plate 20kgs inchar rei siak 22 March, Zirtawpni
13 Thingtum inchar tam siak (Log press) 30 March, Inrinni