Liverpool leh Man City an inum zel

Premier League nomawi inchuh boruak a ngaihnawm zel a, a chung lama awm pahnih Liverpool leh Manchester City chuan Nilaini zan khan an khingpui ve ve an hneh.

League match hnuhnung pali-a point ruk ngawt an hloh hnuah Liverpool an insiamṭha a, an mikhual Watford chu 5-0 ngawta sawpin an inhrithla. Reds tan Sadio Mane leh Virgil van Dijk ten goal hnih an khung a, Divock Origi chuan goal khat a thawh ve bawk.

Manchester City-in Liverpool thlah fal an duh bik lo. West Ham lakah goal hmaah vanduai mah se penalty an hmuh chu vanneih nan an hmang a, Sergio Aguero chuan pet lutin 1-0 in Hammers an hneh.

City-in Reds an phak lohna hi point khat chauh a ni a, league match 10 chauh khelh tur a awm tawh bawk - nomawi inchuh boruak a la ngaihnawm dawn chauh tihna a ni.

Mane is back!
Liverpool-in Watford laka goal hmahruai khung turin hun an mamawh rei lo - Bayern Munich leh Manchester United laka 'nil' Sadio Mane a inlar vat a, minute kuana Trent Alexander-Arnold siamsak chu a tauh lut.

Minute 11 a liam chauh a, Mane bawk kan hmu nawn. Senegalese forward hian Trent-a siamsak bawk chu la 'per' deuh mah se player fing zia chhuahin a ball per hi a back heel lehnghal a, goal mawi bik a ni. Anfield-ah sapui rilṭam ang maiin Liverpool an che a, Watford tan kawng a inhawng lo. Roberto Firmino inhliam vanga inlan Divock Origi chuan minute 66-naah goal a khung ve leh a, an chak dawn tih a chiang tawh.

Liverpool ban rinawm Virgil van Dijk-a'n tlarhnung ven chauh a thiam lo tih pholangin goal hnih a khung ve leh a, 5-0 ngawtin mualneitu an chak.

Arnold nge nge!
Manchester United lakah Klopp-a'n Trent Alexander-Arnold aiah midfielder James Milner chu right back atan a chhawr a, Watford laka Trent-a inkhel entute chuan Klopp thutlukna kha an ui let vawng vawng ang.

Alexander-Arnold hian Watford tlarhnung tan hna hautak vawi tam a siam a, Mane goal hnih khung leh Van Dijk khung kha a siamsak a ni a; Stan Collymore, Vladmir Smicer leh Alberto Aquilani hnua Reds player match khata assist vawi thum nei leh thei hmasa ber a ni nghal.

Mohamed Salah-a'n goal khung lo mah se Egyptian forward a khel ṭha a, amah veng tura dah Adam Masina tan mangchhia a ni - Mane goal khung pawh kha Salah tlanchak zar a ni a, post a pet per bawk.

City an chak
Manchester City-in vawi tam West Ham tlarhnung an rum ṭhaih chungin an mamawh ber goal an khung thei lo a, tlarhnung lam inrem ṭha Hammers hmaah City an thamral dawn niin a lang hman.

Mahse, second half-a Pep Guardiola substitution siamin danglamna a thlen a, Raheem Sterling leh Bernardo Silva-te tlan luhtirin inkhel boruak an thlak danglam nghal. Silva hi Felipe Anderson nen ball an inchuhna lamah a tlu a, penalty a hlawh chhuak zui - Sergio Aguero chuan tun season Premier League-a a goal 18-na ni turin goal-ah a chantir.

West Ham hian goal khung ve aiin a venhim lam chu thupui bera an neih a ni a, an hun ṭha neihchhunah Andy Carroll-a shot chu Ederson chuan ṭha zetin a dan sak.

Team inum
Liverpool boss Jurgen Klopp-a'n champion inum boruak a sang tih hriain an dinhmun a thlir a, "Point 69 kan nei ta. A nihna takah chuan point 75 nei thei tawh tur kan ni a, mahse season duhawm tak chu kan hmang tho e.

"Engpawhnise, kan zinkawngah hian hlim takin kal zel phawt ila, khawnge min thlenpui chu kan la hre thuai ang chu," a ti a, chi ai a tum lo. Match 10 khelh an la hmabak a, City manager Pep Guardiola-a'n thil thleng thei tam tak a la awm tih hriain a ṭawng pawr duh bik lo.

Spanish manager chuan, "Thil thleng tur tam tak a la awm. Point hi kan la hloh leh ngei ka ring a, chutiang bawkin Liverpool pawh hian an la hloh leh ang. A tawpah eng nge thleng dawn kan thlir mai ang chu," tiin a sawi.