Chhinga Veng an chak awlsam

Hero 2nd Division League-ah Chhinga Veng chuan nimin khan ATK Reserves chu 3-1 in an hneh a, group C hmahruaitu an ni.

Chhingcows tan hian Vanlalbiaa Chhangte (26'), Godwin Quashiga (53') leh Lalliansanga (65') ten goal an khung a, mikhual lam hian substitute Ashish Jha hmangin minute 73-naah scoreline lan mawi nan goal khat an khung ve bawk. ATK tan hian Mizo tlangval Joseph Vanlalhruaia chuan hul a ṭan a, bench-ah Omega Vanlalhruaitluanga a awm bawk.

Inkhel dangah Trau FC chuan an mual Khuman Lampak Main Stadium-ah Princewill Olariche Emeka (25') leh Joseph Mayowa Olaleye (56') te goal hmangin Mohammedan SC chu 2-0 in an hneh a, Manipur club hi New Barrackpore Rainbow nen point kua hmuin Mizo club hnuaiah an awm.

Chhingcows coach Lalsangzuala Hmar chuan, "Kan khelh dan a lungawi thlak a, ka player-te chungah ka lawm hle. Hahdam hman erawh kan ni lo, kan khelh leh tur New Barrackpore-ah kan ngaihtuahna zawng zawng kan sen a ṭul ang," tiin Vanglaini a hrilh.

2nd Division League-ah hian group khat aṭangin team pahnihin final round an lut dawn a, Chhinga Veng hian March 4, Thawhṭanni zing dar 9:00-ah an hnuai chiaha awm New Barrackpore an hmachhawn ang.