Merseyside derby a hmuhnawm dawn

Liverpool-in Premier League nomawi chawi an tum a, Everton-in tun hnaia an mangchhia aṭangin harhchhuah an tum thung.

Chil chhak phak leka stadium inhnaih, khaw khat club, inhal tak ni si hi an dinhmun a in ang lo viau a, mamawh in ang erawh an nei - chu chu chak a ni. Pathianni zan dar 9:45-ah Everton hian Liverpool an mikhual dawn a, Merseyside derby hmuhnawm tak beisei ngam a ni ang.

Everton fan-ten an beisei ang loh taka season an hman ṭumah an duh ber tur chu an hmelma Liverpool champion tir bik loh hi a ni a, chumi atana pawimawh ber chu Pathianni zana lo hneh hi a ni. Premier League-a red card phawrh hnem berna (21) chu Merseyside derby a ni a, Liverpool captain hlui Steven Gerrard leh Everton captain hlui Phil Neville te khan red card pahnih ve ve an hmu bawk - inkhel boruak a 'hot' dawn tih a chiang.

A rei ta
Pathianni zana team pahnih intawng tur hi Merseyside derby vawi 200-na tur a ni a, Everton chak ṭum chanchin ziak tur chuan thawnthu hlui keu let fe a ṭul ta.

October 2010 khan Premier League-ah Everton hian 2-0 in Liverpool an hneh a, a hnuah hnehna an 'tem' leh tawh lo - a rei vang vang hle. He inkhela goal khungtu pahnihah Tim Cahill chu India-ah Jamshedpur tan a khel tawh a, Mikel Arteta pawh Manchester City assistant manager a ni tawh!

Tun season-a an intawn hmasak zawkah pawh Liverpool hian injury time-a Jordan Pickford chetsual zar an zo a, 1-0 in an chak - match 18 chhung chu Reds lakah a zawna an tlawmna a ni.

Tho ru le!
Iranian sumdawng hausa Farhad Moshiri-a'n Everton-ah neitu nihna a neih hnuin Liverpool khaw club hi siam len a duh a, nomawi hial beisei ngam turin a duh.

Dollar tluklehdingawn khat chuanga tam pawisa neitu hian player lei nan sum a hmang nasa a, tun nipui transfer-ah ringawt pawh khan pound maktaduai 100 deuh thaw an seng. Coach atan hun rei tak chhung Moshiri chil lo ti put tawhtu Marco Silva an lalut a, bul pawh an ṭan ṭha a, December-a Liverpool an tawn hma khan table-ah parukna an ni.

Mahse, December-a Liverpool an ngam loh hnuah hnungtawlh zawngin an kal a, Liverpool an tawn leh dawn meuh chuan pakuana an ni mek -zaninah phuba lak an duh ang.

Mahse...
Thil lang chiang tak pakhat a awm a, chu chu Everton tan Liverpool lakah 'kher' insiamṭhat hi chu a harsa dawn tih hi a ni. Liverpool hian an league match hnuhnung paliah vawi khat chiah hnehna chang mah se an insiamṭha leh tawh.

Premier League-a an match hnuhnung berah Watford chu 5-0 ngawtin an sawp a, inrintawkna an nei let leh tawh ang tih a chiang a, goal nga khung zo hlim Liverpool mikhual hi Everton tan a châkawm lo. Everton tana chanchin lawmawm lo dang chu Roberto Firmino chuan ngai a awh leh ṭan tawh. Firmino hian hliam vangin Watford kha a hmachhawn thei lo a, Everton erawh hmachhawn thei tura beisei a ni.

Firmino a khelh chuan a thiamna leh finna hian player tlanchak pahnih Mohamed Salah leh Sadio Mane-te tan remchanna a siam ṭhin a, hei tak hi Everton tana ven uluk ṭul tur lai chu a ni dawn.

A hla tawh lo!
Kum 2002 khan Liverpool boss Gerard Houllier chuan, "Match 10 chauhin ropuina ram chu kan hlat ta," tiin a sawi a, he thu a sawi lai hian Premier League leh Champions League nomawi chawi theih a inbeisei.

Mahse, season a tawp meuh chuan Reds hi quarterfinal aṭangin Bayer Leverkusen hneh loin an tla a, Premier League-ah Arsenal champion-in pahnihna an ni hram. Houllier angin Jurgen Klopp-a'n ṭawngkam nei lo mah se Liverpool dinhmun hi kum 2002 nen khan khaikhin theih tak a ni a, Liverpool tan ropuina ram a hla tawh lo.

Mahse, Reds hian an zinkawngah tawlhthluk theihna an nei a nih chuan Everton hi chetsual theihna tur tak a ni a, Everton hian chu chu thlentir an chak em em bawk ang.