Ferrari leh Leclerc beiseina a sang

Ningani khan Formula 1 season thar inbuat­saihna pre season test an nei leh a, Ferrari driver beiseiawm tak Charles Leclerc chu a tlan chak ber a. Champion lai Lewis Hamilton chu 10-naah a awm.

Season hmasa ang bawk­in Ferrari hian car an nei ṭha leh hle tih a hriat. Mahse, hun pawi­mawh laia team leh driver ten tihsual an nei leh zauh zauh a nih chuan Merce­des driver tawnhriat ngah Ha­mil­ton leh Valtteri Bottas hnunga awm thei an ni.

Mercedes driver Bot­tas chuan, "Ferrari hi an ṭha takzet tih chu a hriat, kei­ni lam hian a beihlet theihna tur kan ngaihtuah chhuah leh hman ngei chu ka ring," tiin an elpui chu team ṭha ni mah se an hneh leh ngei a rin thu a sawi.

World champion vawi li ni tawh Sebastian Vettel leh Leclerc ten Ferrari car an khalh dawn a, kum 21 mi Leclerc hian beisei aia ṭhain season a hmang a nih pawhin a mak lo ang - test an neih naah ani hi driver dang tana elpui hautak a tling.

Monacan driver Lec­lerc chuan, "March 17 aṭangin inelna tak kan hmachhawn dawn a, Melboure-a kan kal hmain hnathawh tur kan la ngah. Vettel hnen aṭangin thil tam tak ka zir mek zel a, ani nen hian season duhawm kan hman theih ngei ka beisei," tiin a sawi.