A zawnin GSW an chak lo

NBA champion lai Golden State Warriors chu nimin zing khan Orlando Magic lakah 103-96 in an chak lo a, tun hnai an match hnuhnung pahnihna an tlawm zawn ta.

Warriors hian an player pawimawh Kevin Durant an chhawr thei lo a, quarter hnuhnung berah point 11 ngata sang zawk ni hman mah se a tawpah an zuih. An match hnuhnung pali zinga an vawi thum chak lohna a nih avangin inenfiah an ngai hle.

Orlando Magic tan point 22 score tu Aaron Gordon a hmuhnawm a, Gordon hian rebound vawi 15 la bawkin GSW nen an intawn hnuhnung 11-a an chak loh vekna record chhe tak chu a thaibo sak a ni.

Nimin zing inkhel dangah James Harden a hmuhnawm lehpek hle. Most Valuable Player nilai hian Miami Heat lakah point 58 ngawt neiin Houston Rockets chu 121-118 in hnehna a chanpui.

Rockets hian an player pawimawh Eric Gordon leh Kenneth Faried te chhawr thei lo mah se, an thiampuipa Harden a chet ṭhat em avangin a hliah­khuh hneh hle a ni. Tun season kal laiah Harden hian point 50 score tlin tawhna match ṭum ruk ngawt a nei a ni.