Kane awmna Spurs hmaah Auba telna Arsenal

Zanin dar 6:00 hian Wembley Stadium-ah North London Derby vawi 198-na khelh a ni dawn a, Tottenham Hotspur-in an hmelma Arsenal an mikhual tur hi Premier League nomawi inchuhna ni lo mah se, season thara Champions League khel tura hmun ruak inchuhna a nih avangin boruak a 'hot' dawn.

Season tir lama an intawn ṭumin Emirates Stadium-ah Gunners hian 4-2 in hnehna an chang a, inrintawkna an nei sang ang. Mahse, league match bika Spurs an lenchilh hnuhnung pahnihah goal an khung loh bakah an tlawm ve ve - Mauricio Pochettino nauten mikhual thlen an huphurh hran lo ang.

UCL ticket
Arsene Wenger-a'n Arsenal a enkawl season hnuhnung pahnihah Champions League a khelh pui phak lo, amah thlaktu Unai Emery tan league nomawi aiin UCL ticket neih phak chu hna pawimawh hmasa a ni.

Arsenal hi palina nilai ni mah se, an hnuaia awm Manchester United (55points) aia an san zawkna chu point khat chauh a ni a, match khata khel tlem zawk Chelsea nen an inkarah pawh point thum chauh a awm - vawi khat chetsual zeuh chuan paruknaa tlak thlak theih a ni.

Gunners defender Shkodran Mustafi chuan, "Statistics hmang chuan kan ṭhatna leh ṭhat lohna lai tam tak sawi tur a awm, ṭhatna lai tam tak nei mah ila a sang pali zinga kan tel chuang loh chuan awmzia a nei lo," tiin team lian pali zinga tel ngei a pawimawh zia a sawi.

Auba hlau ru!
Pierre-Emerick Aubameyang-a'n December thlaa an inhmachhawn ṭumin Tottenham lakah goal hnih a khung a, Gabon international hian tun thlengin league-ah goal 16 khung tawh. Ani veng tur hian defender tawnhriat ngah Jan Vertonghen leh Davinson Sanchez te an thawhrim a ngai dawn.

Tun season London derby hrang hranga goal ruk khung tawh Aubameyang thlawp tur hian, playmaker Mesut Ozil leh Henrikh Mkhitaryan an khel ṭha bawk a nih chuan Tottenham tana dan harsa tak tur an ni ang. Amaherawhchu, Pochettino-a'n Tottenham a enkawl chinah league match bika Arsenal an mikhual tawhnaah chak loh an la nei ngai lo - Unai Emery naute hmabak a awlsam bik lo ang.

Nomawi a bo
Nipui leh thlasik bazara player lalut lo chungin Tottenham-in season an hmang ṭha a, mahse an match hnuhnung pahnihah Burnley leh Chelsea an ngam loh avangin North London club tan hian hmahruiatu Liverpool leh Manchester City umphak beiseina a thamral tluka ngaih a ni.

Team talbuai Blues lakah goal zawna pet nei miah loin Spurs 2-0 in an tlawm a; inkhelh banah Poch chuan, "Insawisela in dem hun a ni lo, inkhel pawimawh tak kan hmachhawn tur atana inbuatsaihna hun a ni," tiin a sawi, a zawna London club pahnih ngam loh a tum lo.

Argentine manager hian an tan nomawi beisei ngam chi a nih tawh loh thu a pha lo a, chutih rualin UCL khelh bakah hmelma team hneh a duh thu a sawi. Poch chuan, "Wembley-a inkhel tur kan ni a, kan inkarah point li a awm mek. Kan tan chauh pressure a awm a ni bik lo, an tan a nasa zawk hial ang," a ti.

Kane telna
Premier League season hnuhnung pathum zinga vawi hnih top scorer ni thei Kane hliam a dam chiang tawh a, English striker hian Burnley lakah a dam zia puan nan goal a khung bakah Chelsea a hmachhawn leh thei tawh bawk.

Season kal laia league goal 15 khung tawh Kane hi Tottenham tan thlamuanpui tham a ni. Chutih rualin a awm loh laia khel ṭha tak Son Heung-min chu match hnih chhung a 'bo' ta! South Korea international Son hian Kane awm loh laiin league bikah chuan a team a chakpui vek.

Tottenham tan midfielder Dele Alli a inlan theih a beiseiawm tawh a, ani hi a dam a nih chuan Kane, Christian Eriksen leh Son te nena an inkawp fuh chu tlarhnung phui lo tak Arsenal tan buaina tham an tling ang.