El Clasico: Real vs Barca a hmuhnawm dawn

Zanin dar 12:30 hian khawvel ngaihven hlawh inkhel en tur a awm dawn - Real Madrid chuan La Liga inkhelah Barcelona an mikhual dawn a, football khawvelin Spain lam a hawi ang.

Tun hi El Clasico 'hot' hun tur tak a ni. Team pahnihin La Liga champion an la beisei ve ve avangin tun inkhel hi nomawi inchuhna ang hiala sawi a nih pawhin a awm lo hran lo. Spanish top flight league-ah hian Atletico Madrid chuan table chung ber an luah mek a, match 29 khelh tawhah an hnuai chiaha awm Barcelona aia an sanna chu point khat chauh a ni.

Barca hnuai chiahah Real Madrid an awm ve leh a, Madrid khaw club hian point hnihin Barca an thlau - La Liga-ah champion thei pathum an la awm a, zanin inkhel result hian champion tur thui takin a hril dawn.

Barca buaina
December 5 khan Barcelona chuan La Liga kai thar Cadiz chu league match-ah an ngam lo a, hmahruaitu Atletico Madrid chu point 12 ngawtin an thlauh phah.

Cadiz laka 2-1 a an tlawm chiah hian Barca-in an league match hmasa 10-ah vawi li chiah hnehna an chang tihna a ni a, vawi li an tlawm a, vawi hnih draw result an nei - kum 32 hnua league-a bul an ṭan chhiat ber ṭum a ni. Hetihlai hian Barca fan-ten champion an sawi ri ngam lo a, khelmual pawna an buaina chu khelmual chhung buainain a zui avangin an phur lo.

Coach thar Ronald Koeman ban thu thlengin a ri hman a, an thiampuipa Lionel Messi-a'n Catalan club tan a rilru a pe tawk ta lo deuh anga ngaihna hial thlengin a awm hman.

Barca harhna
Barca laka mipui beisei a bo lai takin thil mak a thleng zui a, Barca-in harh tharna an chang - an league match hmasa 10-a vawi li chiah chak kha an league match hnuhnung 19-ah an tlawm tawh lo!

Catalan club hian vawi 16 hnehna changin vawi thum an khingpui an draw a, an match hmasa 10-a point 14 chiah hlawh chhuak thei khan an match hnuhnung 19-ah point 51 an hlawh chhuak. Barca-in harhna an chan theih nan Messi bawk chu player thawh hlawk a ni. Tun season inelna hrang hranga a match hmasa 18-ah Messi hian goal riat a khung a, assist vawi hnih a nei - a goal khung zinga goal ruk chu penalty a ni!

Mahse, season a rei tial tial a, Messi a ṭha tial tial. Argentine forward hian a match hnuhnung 20-ah goal 19 khungin assist vawi riat a nei leh tawh - Sergio Ramos (hliam) leh Raphael Varane (Covid-19) tel loa khel tur Real tlarhnung tan fimkhur a ngai dawn.

Fak tlak Koeman
Barca-in harhna an chan theih nana thawhhlawk, fak loh theih loh chu Ronald Koeman a ni. Dutch coach hian tun hnaiah 3-4-3, 3-5-2 leh 3-4-2-1 a inhman chhawk ṭhin a, a bul ṭanna chu February-a 2-0 a Sevilla an hneh kha a ni.

Koeman-a'n tlarhnunga central defender pathum hman chu Sevilla lakah a 'enchhin' a, he 3-1-4-2 formation-ah hian Ousmane Dembele chu Messi thlawp tura awmin inkhel hmuhnawmna pho chhuaktu a ni. Barca league match hnuhnung berah erawh Koeman a chesual ṭep a, tlarhnung laia Frenkie de Jong-a dah chu second half-ah midfield-ah pawt letin an mualpho tur an him.

Mahse, hei tak hi Barca ṭhatna chu a ni - Koeman-a'n an khelh ṭhat loh pawha hman turin formation duan sa a nei a, Barca an him leh ṭhin. Zaninah Real tan hna a hautak dawn tihna a ni.

Real an tho e!
Barcelona harhna chan thu kan ziak a, tun hnaia Real Madrid chet ṭhatna hi thup bo mai theih chi a ni bik lo - an league match hnuhnung 19-ah vawi khat chiah an tlawm.

Real hian hetih chhung hian vawi li an khingpui an inhnehtawkpui a, vawi khat an tlawm a, vawi 14 ngawt hnehna an chang. Madrid khaw club hi an season bul ṭan dan erawh a ropui bik viau lo. An match hmasa 10-ah vawi nga chiah an chak a, vawi thum an tlawm a, vawi hnih an khingpui an inhnehtawkpui - mahse, tunah chuan 'team dang' an ni tawh a, Barca ang thoin an phur vanglai tak a ni.

Real hi Champions League quarterfinal first leg-a 3-1 a Liverpool mualphotu an ni a, phurna nasa tak nen Barca an mikhual dawn avangin beiseina an nei sang ang.

Real tan buaina
Tun hnaia team pahnih 'form' thlirin inkhel hmuhnawm a beisei ngam a, chutihrual chuan Real hian an captain Ramos leh Varane an chhawr thei lo tur hi an tuar mai thei - he thu buatsaih a nih lai hian Dani Carvajal dinhmun a chiang lo bawk.

Hriat tel tur erawh Real hian Ramos leh Varane tel loin Liverpool an hneh a, goal khat chiah an chhuah. Player pahnih aia lut Nacho leh Éder Militao-te inkawpin tlarhnung an veng ṭha hle. Chutihrual chuan Barca hian Messi an neih miau avangin ngaihngam taka awm chi a ni lo. Catalan club tan tlarhnunga khel turin Gerard Pique-a'n dam lam a pan leh tawh a, bul a ṭan theih chuan De Jong-a'n nuam a tih berna midfield-ah ngaihngam takin a khel leh thei tawh ang. Koeman chuan a player chu 100% a a dam a nih loh chuan a hmanhmawh loh tur thu a sawi thung.

El Clasico hi Messi vs Ronaldo vang ringawt pawhin a 'hot' ṭhin a, tunah erawh Ronaldo hmun ruak luahtu chu Karim Benzema a ni ta. French striker hian tun season inelna hrang hrangah match 34 khelin goal 24-a khung tawh a, assist vawi ruk a nei bawk - Eden Hazard chu rawn kir theih tawh tura ngaih a ni bawk a, ngaihthah an thiang lo.