Haaland-a autograph ṭanpui ngaite tan

Borussia Dortmund forward Erling Braut Haaland-a'n Manchester City nen an inkhela assistant referee Octavian Sovre-a 'card' a 'sign' sak chu SOS Autism Bihor centre ṭanpui nan lilam a ni dawn.

Champions League quarterfinal first leg-ah Manchester City chuan Borussia Dortmund hi 2-1 in an hneh a, inkhelh zawhah Sovre hian tunlai striker 'hot' ber pawl Haaland-a autograph a dil. Inkhel enkawltu official-in player hnena autograph an dil hi thil thleng ngai lo a ni a, Bayern Munich midfielder hlui leh BT Sport pundit Owen Hargreaves chuan Assistant Referee chet dan hi a lo sawisel tawh.

Mahse, autistic (rilru lam harsatna) neite enkawlna hmun, Romania-a awm, mi thil pek tlingkhawm hmanga enkawl SOS Autism Bihor centre puih nan Sovre hian a thil dawn hi a pe a, lilam a ni dawn ta a ni. He hmun enkawltu leh Sovre-a ṭhianpa ni bawk Simona Zlibut chuan, "Ka naupan laia ka ṭhian ṭha Octavian-a'n yellow card leh red card, Haaland-a hming ziak chuanna a rawn 'donate' hi ṭangkai taka hman a ni ang," tiin a sawi.

Sovre hian a card-a sign tir avang hian sawiselna tawk mah se City boss Pep Guardiola chuan a chhan a, Spanish manager chuan, "Haaland-a fan a ni a ni ang chu. A fapa emaw a fanu tan a duh pawh a ni thei. "Hetiang thil hi tun hmain ka hmu ngai lo a, mahse inkhelh chhung zawng khan referee leh linesman-te khan thutlukna dik tak an siam a, hna ṭha tak an thawk a ni," a ti a, inkhelh zawh lam thil thleng a pawimawh loh thu a sawi.