City tan player langsar lak a harsa?

Premier League hmahruaitu Manchester City chu Borussia Dortmund forward Erling Braut Haaland nen sawizawm ni mah se khawthlang media-te chuan sum lam harsatna avangin lakluh an harsat dawn niin an sawi!

City hian tun hnaiah 2019-20 season a an sum dinhmun an tlangzarh a, pound maktaduai 126 an hloh - an sum lakluh hi pound maktaduai 478.4 a ni a, a hma season nena khaikhinin 11% in a tlahniam.

Hetihrual hian City sum lakluhah hian June 30, 2020 hnua player hralhna aṭanga lut chhiar tel a ni lo a, heng zingah hian Bayern Munich hnena pound maktaduai 54.8 thlenga sang chho thei tura Leroy Sane an hralhna sum pawh a tel.

Chutihrual chuan season kal mekah City hian hlawkna tel theih an inbeisei a, chuti a nih chuan tun season nena chhiar telin season hnih chhunga kum khata an sum hloh hi pound maktaduai 60 aiin a tlem ang.

Financial Fair Play avangin 2019-20 leh 2020-21 sum lakluh hi kum khatah ziah luh a ni dawn a ni. City hian 2019-20 season khan Pep Guardiola leh a player-te hlawhah ringawt pound maktaduai 351 an seng a, hei hi an sum hloh titamtu pawh a ni.

City player-te hlawh tam chhan hi 2018-19 season-a tualchhung inelna nomawi pathum an chawi vek avanga club-in bonus pound maktaduai 35.7 zet a pekchhuah a ngaih vang a ni a, Premier League season khata club pakhatin player hlawha a sen hnem ber record an siam.

Manchester United chuan 2018-19 season khan player hlawhah pound maktaduai 332 an seng a, he record hi City hian an rawn khum ta a ni - hetiang boruak karah hian player hlawh hnem uchuak bawk lakluh belh hi City ang meuh tan pawh a harsa mai thei.

Chu mai a ni lo, City hian an fachuam Kevin De Bruyne chu kum 2025 thleng an hnena cham turin contract thar an ziahpui a, khawthlang media-ten an tarlan dan chuan Belgian midfielder hian kar khatah £430,000-a hlawh dawn - Premier League-ah ani aia hlawh hnem an awm lo.

City hian an player ṭangkai Raheem Sterling chu contract thar an zawrh mek bawk a, June 2023-a a contract neih lai hmang zo tur forward hian kar khatah £200,000-a hlawh mek - a pung ngei dawn.

Manchester khaw club hian Haaland hi an lalut duh a nih chuan Premier League-a hlawh hnem ber tura £500,000 tal hlawhtir an inhuam a ngai dawn a, hei tak hi an sum hloh nena ngaihtuahin City tan a harsa mai thei. Chutihrual chuan City hian an legend Sergio Aguero chu nipui hunah an chhuahtir dawn a, Argentine striker hian kar khatah £250,000-a hlawh mek.

Premier League hmahruaitu Manchester City hian vawiin tlai dar 5:00-ah league match khel turin Leeds United an mikhual dawn a, inkhel hmuhnawm a beisei ngam ang.