Haaland hi khawvel striker ṭha ber a la ni thei - Lewy

Bayern Munich striker Robert Lewandowski chuan Borussia Dortmund striker Erling Haaland a fak a, Norwegian striker chu khawvel striker ṭha ber a nih theih thu a sawi.

Hliam vanga chawl mek Lewy chuan, "Player ṭha bik a ni a, theihna a nei sang. A kum a la naupang a, goal khung châkna a ngah bawk. Khawvel striker ṭha ber ni turin theihna a nei a, chutihrualin a a awlsam dawn lo," tiin Haaland-a chungchang a sawi.

Norwegian striker Haaland hian tun season Bundesliga-ah goal 21 a khung tawh a, Lewy erawhin goal 35 a khung tawh. Dortmund striker hi kum 20 mi chauh a ni a, Lewandowski aiin kum 12-in a naupang zawk a, hmabak a nei êng hle.

Bayern tana chanchin lawmawm lo erawh Lewandowski hi PSG nen Champions League quarterfinal an khelh hunah a la inlan thei dawn lo a, Polish striker bakah hian Leon Goretzka leh Niklas Sule ten inhliam vang thoin PSG an hmachhawn thei lo ang.

Bayern Munich hian zanin dar 7:00 hian Bundesliga-ah Union Berlin an mikhual dawn a, league nomawi huhim turin an chak a rinawm. Zanin dar 10:00-ah Borussia Dortmund-in Stuttgart an hmachhawn dawn bawk a, Haaland-a telna team hian season thara Champions League khel turin hnehna an chan ngei a ṭul bawk.