Emirates Stadium-ah Arsenal an ngui

Mikel Arteta hnuaia Arsenal season chhe tak khuh mawi theihna awmchhun chu Europa League nomawi a ni tawh a, amaherawhchu Gunners hi an mualah Slavia Prague-in an chelh a, nomawi sawi rik ngam a ni rih lo.

Ningani zan Emirates Stadium-a inkhelah Arsenal-in mikhual Slavia Prague lakah inkhel thunun mah se goal khung an harsat. Minute 86-naah substitute Nicolas Pepe-a'n goal pawimawh a khung a, mualneitu hian chak thei turah inngai mah se injury time-ah Tomas Holes hmangin Prague-in an sut a, 1-1 in inkhel a tawp.

Laipui a tlawlh
Arsenal-in kar liam ta khan Liverpool an hmachhawn a, 3-0 in an tlawm. Club ṭantute leh football expert-ten Gunners khelh dan an sawisel nasa hle. Mikel Arteta-a'n Slavia Prague lakah player paruk zet a thlak a, captain Pierre-Emerick Aubameyang pawh bench-ah dah a ni.

Auba tel lo chungin Gunners goal bawh a na a, goal chance pawh an ngah. Amaherwhchu first half-ah goal hmuh tur a awm lo a, goal hmaah Alexandre Lacazette a vannei tawk lo.

Second half-ah Aubameyang, Pepe, Gabriel Martinelli leh Mohamed Elneny te luhtirin Arsenal-in goal khung ngei tum mah se goal hmaah an hriam tawk lo. Hming langsar ber Auba pawhin holam takin a hlah a, Willian-a'n freekick aṭangin goal ban a pet per bawk.

Minute 86-naah Arsenal tan chanchinṭha hriat tur a awm ta a, Nicolas Pepe-a'n goal pawimawh a khung. Gunners-in an khelh ṭhat loh ṭumah hnehna an chang turah an inngai a, mah se Prague lamin tum dang an nei. Injury time-ah Tomas Holes-a'n Prague siphurh a sut a, 1-1 in inkhel a tawp.

Beisei nei Arteta
Gunners boss Mikael Arteta chuan, "Semifinal thlen kan duh a nih chuan goal kan khung a ngai. Second leg-ah kan khung ngei ka ring a, Prague-ah hnehna kan chan ngei ka ring," tiin a sawi. Prague-in away goal an neih avangin Arsenal-in second leg-a goal an khung lo a nih chuan an tla dawn.

Arsenal hian Pathianni zan dar 11:30 hian Premier League table mawngphaha awm Sheffield United an hmachhawn dawn a, April 15, Ningani zanah Slavia Prague nen second leg an khel lehnghal ang. Prague hian Leicester City leh Rangers an hneh tawh a, Arsenal hneh turin theihna an nei tih chu a chiang a ni.

Inkhel dang
Villarreal-in khualmualah Dinamo Zagreb 1-0 in an hneh a, goal awmchhun hi Gerard Moreno-a'n penalty aṭanga a khung a ni. Yellow Submarine hian semifinal an lut a nih chuan Arsenal leh Slavia Prague chak zawk an hmachhawn ang.

Champion rinkai zinga mi Ajax-in an mualah AS Roma 2-1 in an hneh lo. Davy Klaassen hmangin Dutch club-in khung hmasa mah se Italian club-in Lorenzo Pellegrini leh Ibanez te hmangin second half-ah an lehthal.

Armsterdam Arena-ah Ajax hian minute 53-naah penalty an hmu a, Dusan Tadic-a'n a hlah. Dutch club-in 2-0 a hmahruai theihna hun ṭha an bawhpelh a, Tadic-a'n penalty hlah avangin Ajax tan Italy-ah hnehna chan ngei a ṭul dawn a ni.