Inter Milan hmaah Cagliari

Juventus-in Italian football an thunun a, tun season-ah erawh a danglam dawn. Inter Milan-in kum kua chhung a zawna champion tawh Juventus hnen aṭangin Serie A nomawi an chhuhsak dawn.

Antonio Conte kaihhruai Inter hian an hnuai chiaha awm AC Milan aiin point 11 in an hmu tam a, champion lai Juventus aiin point 12-in an hmu tam zawk. Inter hian Pathianni tlai dar 4:00 hian Cagliari an hmachhawn dawn a, hnehna an chan theih chuan nomawi an hnaih sawt ang.

Nerazzurri hian tunkar khan Sassuolo 2-1 in an hneh a, league match 10 chhung an chak zawn tawh. Chutihrualin Cagliari hi table-ah 18-naah an awm mek avangin khelh an harsa dawn. Radja Nainggolan hoin Cagliari hian Inter hi barakhaih ngei an tum ang.

Inkhel dangah pahnihna Milan-in zanin hian Parma an tlawh dawn a, Juventus-in Pathianni zan dar 6:30-ah Genoa an mikhual ang.