Premier League top four: A ‘hot’ tual tual
European football an khel zo a, tualchhung league lamah Europe club-te an insawrbing leh ta - kartawp Premier League-ah pawh inkhel hmuhnawm en tur a awm nual dawn.
Zanin inkhel tur zingah top four-a season khar beisei Liverpool leh Chelsea an tel a, Pathianni zanah West Ham leh Leicester City an intum dawn bawk.
Liverpool hian zanin dar 7:30-ah Aston Villa an mikhual dawn a, Villa hi season thara Europe-a inlan beisei ve tho an nih avangin a awlsam dawn lo. Reds inkhel en zawha en nuam tawk turin zan dar 10:00-ah Crystal Palace chuan Chelsea an mikhual dawn bawk a, hei pawh inkhel hmuhnawm beisei a sual lo ang.
Pathianni zan dar 6:35-a inkhel tur mawlh hi mit ti tlai tur a ni - palina dinhmun luah mektu West Ham chuan pathumna Leicester City an mikhual dawn a, Hammers hian hnehna an chan chuan Foxes nena an inkarah point khat chauh a awm tawh ang.
Anfield a nghing
Liverpool-in tun season Premier League-a Anfield-a an match hmasa pasarihah hnehna an chang vek a, Anfield-a an league match hnuhnung pariatah an tlawm vek thung.
Reds-in insiamṭhat an mamawh tih chiang takin a lang a, mahse, he team hian tun season-ah insiamṭhat an harsat hle - an tho hlen dawn emaw tih hnu lawkah an tlu leh ṭhin. Jurgen Klopp-a naute hian an league match hnuhnung berah hmuhnawm takin Arsenal chu 3-0 in an sawp a, Reds fan-te an phur vanglai takin Champions League quarterfinal first leg-ah Real Madrid chu 3-1 in an ngam lo zui.
Liverpool-in Gunners laka an khelh dan anga an khelh chuan Aston Villa hneh hi thil harsa a ni lo ang tih a chiang a, mahse, he team hian season chawhma lamah 7-2 ngawta Reds hi an lo sawp tawh avangin an zuam ang.
Reds beiseina
Liverpool hi league-ah pasarihna an ni mek a, pakuanaah Aston Villa an awm - Villa hian match khatin an khel tlem zawk a, Merseyside club an thlauhna hi point nga lek a ni.
Chumi awmzia chu Villa hian hnehna an chan chuan Liverpool aia match khata khel tlemin an inkar chu point hnih lekin an sawr zim dawn a, Jurgen Klopp leh a naute tan Champions League khelh phak a harsa sawt dawn, tihna a ni. Liverpool-in Virgil van Dijk, Joe Gomez, Joel Matip leh Jordan Henderson te chu inhliam langsar an neih sa a ni a, Divock Origi-a inhliam bawk - player dang inhliam thar lam erawh an awm lo.
Hetihlai hian Aston Villa boss Dean Smith chuan an captain Jack Grealish an chhawr theih loh tur thu nimin khan a tichiang a, "Liverpool hmachhawn turin a la fit tawk lo," a ti. Grealish tel lohna Villa hlauhawmna a nep sawt ang.
Chelsea an insiamṭha
Blues-in rin loh taka West Brom an ngam loh avangin top four an beiseina a nghing hman a, table-ah pangana lamah tla thla zuiin an chunga awm West Ham chu point khatin an phak lo.
Mahse, London club hian Thomas Tuchel-a hnuaia a vawi khat nana an tlawm hnuin thawh leh an harsat lo tih an pholang a, Champions League quarterfinal first leg-ah FC Porto chu 2-0 in an hneh zui a, zanina Crystal Palace an hmachhawn hunah pawh chak an beisei ang.
Zaninah pawh Blues hi point thum aia hniamah an lungawi lo ang tih a chiang a, Baggies laka hnawhchhuah Thiago Silva an chhawr thei dawn lo tih loh chu an player an dam kim bawk - Tuchel-a'n an ṭhat dan berin Palace a pan thei dawn tihna a ni. Palace hian hliam vangin Nathaniel Clyne, Nathan Ferguson, Mamadou Sakho, James McCarthy, James Tomkins leh James McArthur an chhawr thei lo mek a, London derby-ah Palace tan chak beisei a harsa ang.
Hammers vs Foxes
Tun season-a beisei phak baka season hmang ṭha chu West Ham leh Leicester City an ni a, Pathianni zana team pahnih intawng tur hi en a châkawm tawh hle - club pahnih hian point thum hloh chuan top four beiseina a derthawng thei tih hre chungin an khel dawn a, a hmuhnawm loh ring suh.
Coach intuai thar David Moyes kaihhruaina hnuaiah West Ham hian an beisei phak baka result ṭha an nei mek a, Foxes hi season ṭantir khan khualmualah 3-0 in an lo sawp tawh bawk. Mikhualna rama an ngam hnu team hi mahni muala ngam loh an duh lo ang.
Brendan Rodgers-a hnuaiah Foxes an hmuhnawm a, mahse, an league match hnuhnung berah hmahruaitu Manchester City chu 2-0 a an ngam loh avangin an rilru hnual lai tak a ni thung. Chutihrual chuan Foxes hian season ṭantir khan City hi 5-2 in an lo hneh tawh a, Arsenal, Chelsea, Tottenham Hotspur leh Liverpool chu vawi khat ṭheuh an hneh tawh bawk - Hammers lakah chak theih an inring ang.