Khaled Memorial Huntharin final an lut

Nimin khan Hunthar-in Khaled Memorial 2nd Division Screening Tournament final lut turin Luangmual an sawp a, final-ah Legends an hmachhawn ang. Cricket Association of Mizoram chuan nimin khan thuchhuah an siam a, 2nd Division final chu vawiina khelh tur ni mah se April 13-a an sawn thu an puang.

Durtlang khelmualah Hunthar leh Luangmual ten league match hnuhnung ber an khel a, G. Lalbiakvela telna team Luangmual-in final lut turin chiang takin an chak a ngai. Luangmualin vuak hmasak an thlang a, run 76 chauh an siam tihin an thi fai vek. Huntharin an bat hauh hmain final an lut dawn tih a chiang a, hnehna chang tur pawhin harsatna an tawk lo.

Hunthar tan B. Lalnunfela'n run 37 a siam a, wicket khat chauh hlohin over 9.4 lekah run 77/1 siamin target an umpha. Hunthar bowler Moses Ramhlunmawia'n run 12 chauh pein wicket thum a la a, man of the match-ah thlan a ni.