Pathianni zanah Spurs Vs Man United

Premier League-ah champion tur a chiang tawhah a ngaih theih a, Champions League khel tur erawh a la chiang lo. Pahnihna Manchester United pawh la khel lo thei dinhmunah an ding a, chutihrualin parukna Tottenham Hotspur leh pasarihna Liverpool te pawh Europe-a inelna sang bera inlan thei dinhmunah an la ding.

Pathianni zan dar 9:00 hian Tottenham Hotspur-in Man United an mikhual dawn a, Jose Mourinho hoten nikum October thlaa 6-1 a an sawp tawh hi an mualah hneh ngei an tum dawn a ni.

A danglam ta
Spurs leh Man United te an inkhelh hmasak ṭum kha season ṭantir lam a ni a, khatih lai table leh tuna table chu a danglam tawh hle. Round lina an khelh zawh khan a sang palia awmte chu Everton (12), Aston Villa (9), Leicester City (9) leh Arsenal (9) te an ni a, Spurs hi point sarih hmuin paruknaah an awm.

Manchester United erawh match thumah point thum chauh an hmuh avangin 16-naah an awm a, an manager hlui Jose Mourinho hote lakah 6-1 zeta an chak loh avangin an inkar hi a lang zau lehzual.

Tunah erawh Ole Gunnar Solskjaer-a hoten match 30 aṭangin point 60 an hmu a, Spurs aiin point 11-in an hmu tam zawk. Man United-in an hmelma Man City elpha lo mah se Champions League khelh a harsa tawh dawn lo niin a lang.

Chutihrualin Spurs erawh Liverpool nen point 49 ve ve an hmu a, Chelsea (51), West Ham (52) leh Leicester City (56) te nen an point a inhnaih hlawm avangin Europe inelna sang bera khelh a harsa dawn.

Spurs hi...
Season ṭantirhah kha chuan Spurs chanchin sawi apiangin Harry Kane leh Son-Heung Min te sawi tel a ngai ṭhin. Tunah erawh player ṭha pahnih hi an theihna la ngai reng mah se an thawm erawh a reh deuh.

English striker Kane hian tun season league-ah goal 19 a khung tawh a, match hnuhnung bera Newcastle United nen 2-2 a an inhnhehtawk ṭum pawhin goal hnih a khung. Son-a erawh inhliam vangin a chawl a, Newcastle lakah bench aṭanga rawn lut leh tawhin Man United laka bul ṭan turin a inpeih tawh ang.

Jose Mourinho-a'n Newcastle laka an goal khung an humhim theih loh chhanah player a mawhpuh a, Man United lakah tlarhnung remphui a ṭul dawn. Newcastle laka inlan lo Toby Alderweireld leh Serge Aurier te chhawr theihin an awm dawn a, hemite pahnih hi London club tlarhnung remphui nan an pawimawh ang.

Engtin zel?
Manchester United aiin Spurs tan chak a pawimawh zawk a, Jose Mourinho tan 'bus park' a rem loah a ngaih theih. Solskjaer-a hoten mualpho nawn an tum dawn lo a, mipui mit fukna tur chu goalkeeper a ni dawn.

Premier League match hnuhnung berah Dean Henderson a inlan a, Europa League-ah David de Gea a inlan thung. Tun dinhmuna a lan dan chuan Henderson hi United number 1 keeper-ah a chhal theih a, Spurs lakah hian a inlan a rinawm zawk a, Spurs tlarhma lakah fiahin a awm ang.