Man United-in Granada an hneh

Manchester United chuan Europa League quarterfinal first leg-ah Granada 2-0 in an hneh a, Ole Gunnar Solskjaer hote hi semifinal lut turin an dinhmun a ṭha hle.

Los Cármenes-ah mikhual team tan Marcus Rashford leh Bruno Fernandes ten goal an khung a, second leg hi Old Trafford-ah April 15, Ningani zanah khelh a ni ang.

Ningani zan inkhelah minute 31-naah Victor Lindelof-a ball vawrhchhuah chu Rashford-a'n ṭha taka la thlain goal-ah a chantir a, Granada keeper Rui Silva tan dah theih a ni lo.

Man United-in inkhel thunun mah se Spanish club pawhin chance ṭha an nei a, Man City aṭanga loan hmanga an hawh Yangel Herrera-a'n goal ban a pet per bakah Tottenham striker hlui Roberto Saldado-a'n chance ṭha a hlah bawk.

Hun tawpah Manchester United-in penalty an hlawh chhuak a, Bruno Fernandes-a'n a penalty hlawhchhuah chu goal-ah a chantir a, United 2-0 in an chak.

Man United-in away goal an neih avangin semifinal lut turin an dinhmun a ṭha a, chutihrualin midfielder Scott McTominay, left-back Luke Shaw leh central defender Harry Maguire te hrem vangin a khel thei dawn lo.

Manchester United manager Ole Gunnar Solskjaer chuan, "Zan duhawm tak a ni lo. Yellow card pathum kan hmuh avangin ka payer-te hrem an ni dawn. Amaherawhchu 2-0 chu result ṭha tak a ni," tiin a sawi a, second leg-ah pawh chak ngei an tum thu a sawi tel bawk.