Amir Khan-a'n a in a thawh
British boxer rothap Amir Khan chuan England-a National Health Service tana hman turin Bolton-a a in pakhat chu a thawh a, NHS chuan an hmang duh a nih phawt chuan amah be mai turin a ti.
Khan chuan, "TV-ah NHS hian puitu an mamawh thu vawi tam ka hmu a, in lian ṭha leh nuam tak Bolton-ah hian ka nei. An duh a nih phawt chuan NHS chuan he in hi an hmang thei a, damdawi in atan pawh an hmang thei ang," a ti.
WBA leh IBF light-welterweight champion lo ni tawh Khan chuan, "NHS te chuan Bolton-ah hmun hma an mamawh thu an sawi a, an duh a nih chuan min rawn be thei ang," tiin a sawi a, a inhawng hle.
Kum 33 mi boxer hi boxing khawvelah chuan hming langsar pawl niin vawi 39 fight a neihah vawi 34 a chak a, vawi 21 a khingpui knockout tawhin vawi nga a tlawm thung.
Amir Khan hi midang ṭanpuina kawngah a inhmang nasa a, mi harsa zawkte ṭanpui turin Amir Khan Foundation a din hial - fahrah, ral tlan leh mi harsa zawkte nasa takin a lo pui tawh.
University of Bolton chuan kum 2015 khan an khaw tlangval hi midang ṭanpuina kawnga a inhman nasat avangin honorary degree an lo pe hial tawh a ni.