Premier League player-te hlawh ti hniam dawn
English football-a league sang ber Premier League player-te chu club thuneituten coronavirus hri len chhunga an hlawh lakEnglish football-a league sang ber Premier League player-te chu club thuneituten coronavirus hri len chhunga an hlawh lak ti hniam turin an ngen dawn a, an ngenna ang hian a hlawhtling a nih chuan player-te hian 30% ṭheuhin an hlawh an ti hniam ang.
Premier League chuan coronavirus hri leng vanga club tenau zawk ten harsatna an tawh loh nan English Football League (Premier League hnuai lam zawng) leh National League (non-league club) te chu pound maktaduai 125-in an pui dawn bawk.
Hei mai hi a ni lo - Premier League chuan National Health Service puih nan pound maktaduai 20 an thawh bawk a, hri leng vanga khawvelin harsatna a tawh karah mahni chauh in ngaihtuah loa midang pui turin an pen chhuak.
Zirtawpni zana Premier League club-te inhmukhawmin an ngaihtuah zinga ngaihven hlawh ber pawla chhal ngam chu league khelh leh hun tur a ni a, club-te hian thutlukna siam mai loin, "Thu leh awm hma chu khelh a ni lo ang," tih chu an thuchhuah a ni.
English top flight football hi ruahmanna hmasaah chuan April 30 thleng chawlh tur a ni a, mahse Covid-19 hri lengin ziaawm lam a la pan hleihtheih loh avangin club-te chuan a hun ruat loa la chawlh zel rih hi an ruahman.
Premier League chuan thuchhuah siamin, "May thlatira league khelh ṭan leh mai tura ruahman chu tih theih a ni rih dawn lo a, kan zavaia kan him tlan theih hunah season chawlh lailawk chu khelh ṭan leh tur a ni.
"Sorkar leh damdawi lam thiamte thurawn angin kan kal dawn a, annin rem an tih dan ang zelin ruahmanna kan siam dawn a ni," an ti a, anmahni duhdan ang maia league kalpui an tum lo.
Player hlawh tih hniam chungchang bik hi nizan khan Premier League hian Professional Footballers' Association (PFA), Players leh club aiawhte nen an sawiho a, he thu buatsaih lai hian inremna an siam dan tak kan hre hman lo.
Premier League thuneituten league kalpui zel dan turah thutlukna siam harsa an ti a, tuna an him theih dan ber chu 'tiam chin awm loa' league khelh chhunzawm hun sawn hi a ni.
Zirtawpni zanah hian league kalpui zel dan tura thu chhawpchhuah langsar panga a awm a, engemaw ber hi chu Premier League hian an la thlan mai a ngaih a rinawm.
*Season tih tawp a, engmah thleng lo anga tih tawp.
*Season tih tawp nghal.
*League khelh zawh ni tur dah mai.
*Entu awm loa season khar
*Season tawp theih hun nghah tawp.