Champion ze nei Man City

Premier League nomawi inchuh boruak a sang chho a, Manchester City-in champion tura pawimawh ber pakhat 'vanneihna' an neih avangin Inrinni zan khan Vitality Stadium-ah AFC Bournemouth chu 1-0 in an hneh hram. Nizan khan Merseyside Derby-ah Liverpool leh Everton te an inkhel a, Reds hi an chak zo lo a nih chuan khelh zat inangah Pep Guardiola hote hi hmahruaitu an ni ang.

Inhliam leh vannei goal
Manchester City-in hliam vangin first half hun pek belhah Kevin de Bruyne an thlak a, second half ṭan aṭanga minute thumna lekah John Stones an thlak leh bawk. Pep-a hote hian hliam vangin harsatna an nei a, chutihrualin a dam kim lai hian goal an khung lo a. Goal khung theihna tur chance pawh vawi khat chauh insiamin De Bruyne cross chu David Silva-a'n goal-ah a chantir thei lo.

Bournemouth hian tlarhnung rem phui ṭha mah se minute 55-nah Riyad Mahrez hmangin City-in an phu ang ngeiin goal an khung a, an pet goal dan erawh vanneih vang a ni. City midfielder Bernardo Silva pass chu Cherries defender Charlie Daniels chuan clear fuh loin Silva zawnah bawk a tla a, Portuguese midfielder chuan Mahrez tan siam sakin Leicester City player hlui hian Artur Boruc-a venna lamah a khung a, keeper-in a tihtur a ti tawk lo.

Amaherawhchu kum 39 mi Cherries keeper Boruc hian ṭha takin Sergio Aguero goal khung tur a dan sak a, Raheem Sterling-a goal khung tur a dan sak bawk. Man City hian goal khat chauh an khung a, goal luh dan nena thlir chuan an vannei. Chutihrualin City tlarhnung erawh a phui ṭha a, mualneitu Bournemouth lamin goal-ah an pet lo hrim hrim a, City keeper Ederson-a tan hna a awm lo.

Pep-a lawm
Man City manager Pep Guardiola chuan, "Kan khel ṭha takzet a, goal zawnah vawi khat pawh an pet lo. Ball kan hloh apiangin player pathum emaw paliin lak let tumin an bawr hman zel a. Kan khelh dan bakah an inpuih tawn dan a fakawm hle," tiin a sawi.

Spanish manager chuan thil awmdan sawi chiang lehzualin, "Goal chance kan insiam meuh lo a, amaherawhchu player 11 in goal venhim hna an thawk. Hei bakah hian ka player-te hian chawlh mumal pawh nei lo chungin an theihna zawng zawngin an khel thei a, an rilru put hmang hi a chhuanawm tak zet a ni," tiin a sawi.

Man City hian Community Shield leh League Cup an chawi tawh a, inkhelh zawh hian league-ah hmahruaitu an ni a, Champions League-ah quarterfinal lut turin an dinhmun a ṭha a, FA Cup-ah an la dam bawk avangin nomawi pali chawi thei dinhmunah an la ding.

March 2, Inrinni
Tottenham Hotspur 1 - 1 Arsenal
TOT : Kane 74' (PG)
ARS : Ramsey 16'
AFC Bournemouth 0 - 1 Manchester City
MAN : Mahrez 55'
Brighton & Hove 1 - 0 Huddersfield Town
BRI : Andone 79'
Burnley 1- 3 Crystal Palace
BUR : Bardsley 15'(OG); Batshuayi 48'; Zaha 76'
CRY : Barnes 90'
Manchester United 3 - 2 Southampton
MAN : Pereira 53'; Lukaku 59', 88'
SOU : Valery 26'; Ward-Prowse 75'
Wolverhampton 2 - 0 Cardiff City
WOL : Diogo Jota 16'; Jimenez 18'
West Ham United 2 - 0 Newcastle United
WES : Rice 7'; Noble 42'