Nomawi 100 chawi thei Federer

Roger Federer chuan tennis a khelh hun chhungin nomawi 100 a chawi tling ta. Inrinni zan khan Stefanos Tsitsipas chu 6-4, 6-4 a hnehin Dubai Tennis Championship-ah a champion a ni.

Kum 37 mi Federer-a'n 4 February, 2001 khan a nomawi hmasa ber ni turin Milan Indoors-ah French player Julien Boutter hnehin a champion a, mellung pawimawh bik (100 titles) thleng tur hian ni 6,600 hun a mamawh.

Grand Slam vawi 20 champion tawh Federer chuan, "Duhthusam chu a takin a rawn thleng dik, a vawi riat nana Dubai title ka la hi a lawmawm, ka lawmna ber pakhat chu nomawi 100 ka chawi tling thei hi a ni," tiin a sawi.

Swiss thiampuipa hian ATP titles neih hnem lamah Jimmy Connors (109 titles) chiah tluk loh a nei a, player la inkhel lai zingah nomawi 80 chawi tawh Rafael Nadal chu amah hnaih bertu a ni bawk. Hmeichhe player Martina Navratilova (167 titles) erawh an hlat hle.

Dubai Tennis Cham-pionship final-a a hneh Tsitsipas hi Federer-a'n nomawi hmasa ber a chawi chuan kum thum mi chauh a la ni. Australian Open-ah khan intawngin Greek tlangval hian hnehna a chang a, tun ṭumah erawh tawnhriat ngah zawk Federer chu dan theih a ni lo.