India-in hnehna an chang

India chuan Australia nena ODI match nga an khelh tura a hmasa berah wicket rukin an chak.

Hyderabad-a inkhelah hian ṭhumvawrah Aussies chakin bat hmasak an thlang a, wicket sarih hlohin Australia hian run 237 an siam.

Mikhual team tan Usman Khawaja chuan run 50 a siam a, captain Aaron Finch duck out mah se Glenn Maxwell (40), Marcus Stoinis (37) leh Alex Carey (36) te zarah target pangngai tak an siam.

India-in bul an ṭan fuh lo a, Shikhar Dhawan chu a ball hmachhawn hmasa berah a thi nghal. Amaherawhchu Rohit Sharma (37) leh Virat Kohli (44) te an vaw chhe lo a, chakpuitu tak erawh MS Dhoni (59) leh Kedar Jadhav (81) te an ni.

ODI match hnihna hi March 5, Thawhlehni tlai dar 1:30-ah VCA Stadium, Maharashtra-ah an khel leh ang.