Football dan thlak zingah 'Handball Dan' an thlak tel

International Football Asso­ciation Board (IFAB) chuan season thar aṭang chuan kut hmanga goal chance siam leh goal khung chu tihpalh vang pawh ni se pawm a ni tawh dawn lo tiin thuchhuah an siam. Ball-in player kut a fuhna hmunah chuan direct freekick hmanga hrem tur a ni ang.

Handball dan chu
Football dana hriatthiam har tak chu handball hi a ni a, dan awm saah hian ball-in kut a fuh hrim hrim hi foul a ni lo. Player (goalkeeper ni lo) chuan tum reng vanga (deliberate) a kuta ball a khawih chuan direct freekick a chawi tur a ni a, goal tur a dang a nih phei chuan hnawhchhuah tur a ni.

March 2, Inrinnia IFAB ṭhu­khawm chuan handball chung­changa dan hi an thlak danglam a, season thar aṭang chuan tum reng vanga handball tih lam niloin ball-in kut a fuh em tih kha a pawimawh tawh zawk dawn. Tihpalh vanga ball-in kut a fuh pawhin foul a ni tawh dawn.

Chutihrualin kut chu taksaah a beh erawh chuan handball a ni dawn lo thung. IFAB technical director David Elleray chuan, "Taksa hian lan dan a nei a, taksa aṭanga kut lak sawn a nih a, an taksa len zawng chu kut vang baka a len phah a nih chuan handball a ni a. Chutihrualin kut chu taksaa tel a nih miau avangin a kut ringawt vanga an taksa lenna chu pawm a ni thung," tiin taksaa kut bet chu handball a nih loh thu a sawi.

Dan dang pawh an thlak
IFAB chuan player inthlak an awm a, hun khawhral nana technical area lam pana muang changa an kal ṭhin tihreh nan player chu goalline emaw touchline hnai ber aṭanga chhuak tawh turin thutlukna a siam.

Freekick pet dawn hian a pettu lamin defensive wall an tibuai fo a, hemi ven pui dan tur te an rel. Ball-in referee a per vanga inkhel kalhmang thlak danglam hlawk te a awm ṭhin a, season tharah erawh 'drop ball' hmanga tih ṭhat tawh tur a ni. Penalty pet dawnin goalkeeper-in a ke pahnihin goalline a pel tur a ni lo tih dan pawh thlak danglam hretin goalkeeper-in a ke khat chauh a goalline-a rah fuh chuan pawm a ni ang.

IFAB chu eng nge?
Football thuneitu sang ber chu Federation Internationale de Football Association a ni a, amaherawhchu FIFA hi Football Danpui - Laws of the Game-ah an thu ber lo. International Football Association Board (IFAB) chu Football Danpui chungchanga thuneitu sang ber a ni.

Pawl pahnih FIFA leh IFAB hi inrelbawlna hrang nimahse a ṭhianga kaldun tlat an ni. IFAB hnuaiah hian Danpui hi a awm a, uluk taka en zuiin a ṭul anga an zirchian hnuah an tidanglam ṭhin.

IFAB-ah hian a dintu United Kingdom ram pali England (The FA), Scotland (SFA), Wales (FAW) leh Nothern Ireland (IFA) te chuan vote li an nei a, chu chu 50% niin a chanve dang hi FIFA kutah a awm. Dan awm sa thlak danglam tur hian hmun thuma ṭhena hmun khat emaw 75% aia tam vote hmuh a ngai a, chumi awmzia chu vote riat awmah vote rukin an remtih a ngai tihna a ni.

IFAB hi June 2, 1886 khan London-ah din a ni a. Kum 1904 khan Paris-ah FIFA hi din ve chauh a ni a, hetah hian United Kingdom ram palite hi an tel lo. Amaherawhchu FIFA chuan inremsiamna neih puiin kum 1913 khan IFAB nen an inzawm a, a tirah FIFA hian ram dang pali zinga pakhat vote neih ang zat tho nei mah se 'a him tawk love' tiin kum 1958 aṭangin tuna kaldan ang hian an kal ta a ni.

IFAB hian kumtinin inmuh­khawm vawi hnih Annual General Meeting (AGM) leh Annual Business Meeting (ABM) an nei a, ṭul bika an neih ṭhin Special Meeting erawh kum 2012 hnuah an nei leh tawh lo. Kumin 2019 atana Annual General Meeting hi Scotland Football Association chuan thlengin March 2 khan Mar­cliffe Hotel, Aberdeen-ah neih a ni.