Arsenal laka point hmu Spurs an lawm

Aaron Ramsey goal 'cool', Harry Kane penalty khung, Pierre-Emerick Aubameyang penalty hlah leh Lucas Torreira red card - heng te hi North London Derby inkhel hmuhnawmah hmuh tur a awm. Tottenham Hotspur-in an mikhual Arsenal chu 1-1 a inhnehtawk puiin harsa takin point khat an sual chhuak.

Champions League khelh inchuha London club elpui Manchester United chuan an mikhual Southampton 3-2 in an hneh hram. Ole Gunnar Solskjaer-a naute hian Gunners tlan pelin palina dinhmun an luah a, an chunga awm Spurs an phak lohna chu point thum chiah a ni.

Ramsey goal
Wembley Stadium-a inkhelah Unai Emery-a'n season thara Juventus player ni mai tur Aaron Ramsey chu bul a ṭantir. Wales international hian counter attack aṭangin fal takin ball a tlanpui a, minute 16-naah Tottenham keeper leh captain ni bawk Hugo Lloris paltlangin goal hmahruai a khung.

Tottenham midfielder fing tak Christian Eriksen-a'n hnai set sawt aṭangin hun ṭha nei mah se Gunners keeper Bernd Leno-a'n a dan sak a, ball per chu Moussa Sissoko chuan na takin pet zui nghal mah se Leno ban tha chak a paltlang zo bik chuang lo.

Aubameyang leh Mesut Ozil te bench-a dan an nih laia striker mal tlat Alexandre Lacazette-a'n a hun ṭha hmasa a hlah hnuah, Alex Iwobi leh Nacho Monreal te thawh rah senga a hun duhawm neih leh a chhawr ṭangkai thei chuang lo - yard riat vel leka hla aṭangin goal pawnah a pet chhuak.

Penalty chu
Tottenham striker Kane-a tauh goal hmasa chu offside vangin pawm sak a ni lo. Mauricio Pochettino nauten minute 74-naah penalty an hlawh chhuak, freekick aṭanga ball kal an inchuhna lamah England captain Kane hi defender Shkodran Mustafi-a'n a nek tlu a, penalty a chawi.

Penalty an hlawhchhuah danah Spurs player hi an offside ngei a, mahse referee Anthony Taylor-a'n penalty spot a kawk. A hlawhchhuaktu Kane-a'n league bikah Arsenal a hmachhawn vawi 12 aṭanga a goal kuana khung nan a hmang.

Goal mamawh Arsenal lamin Ozil dahlut mah se danglamna a siam lo a, hun tawp hma chiahin bench aṭanga lut pakhat zawk Aubameyang chu Davinson Sanchez-a'n a tihtluk avangin penalty a chawi. Mahse, Gabon international hian a hun 'rangkachak' chu a hlah! Substitute Torreira chu Danny Rose a tlawh vangin hnawhchhuah a ni zui bawk.

An lawm ve ve
Tottenham manager Mauricio Pochettino chuan, "Anni aiin kan ṭha zawk a, chak lo tur kan ni lo. A zawna match hnih kan chak loh hnuah point kan hmu, kan khingpui kha Arsenal an nih avangin point thum hmuh chu a harsa a ni. Tunah chuan Borussia Dortmund paltlang turin kan inbuatsaih nghal ang," a ti.

Arsenal manager Unai Emery chuan, "Match tinah point thum hmuh kan tum a, a hlawhtling vek thei lo tih pawh kan hria. Mahse, tun ṭuma kan khelh dan khan min ti lawm, he inkhel hian rilru lamah nasa takin paukhauhna min pek ka beisei," tiin a sawi.

Gunners hian Ningani zanah Europa League last 16 khel turin Rennes an lenchilh dawn a, kar tawpah Manchester United nen league match an khel zui ang. Tottenham hian hian Thawhlehni zanah UCL last 16 khel turin Dortmund an tlawh thung dawn, Poch-a naute hian 3-0 in hma an hruai sa tawh a ni.

Solskjaer-a United
Manchester United-in an mikhual Southamton lakah si phur hmasa mah se, huaisen takin an tho chhuak a, inkhelh banah United manager lailawk Solskjaer chuan inrintawkna neih dan chu tun hma ang mai a nih thu a sawi.

Saints tan Yan Valery leh James Ward-Prowse ten goal an khung a, mualneitu lamin Romelu Lukaku goal hnih leh Andreas Pereira goal khat hmangin an chhang let a, Old Trafford-a goal lut panga hi a mawi em em vek. Hun tawp dawna midfielder Paul Pogba penalty pet chu keeper Angus Gunn-a'n a dan sak a ni.

United manager Solskjaer chuan, "Goal khung thei bik a ni," tiin EPL goal 113-na khungtu Lukaku a fak. An khelh dan sawi zawmin, "Kan club hian hetiang hi kan lo tawng fo tawh a, chak duh vangin kan chauhna kan dah ṭha a, a tawp thlengin theihtawp kan chhuah ṭhin. Saints nena kan khelh dan hi tun hmaa kan khelh ṭhin dan a ni ," a ti.

Nilaini zanah United hian UCL last 16 khel turin Paris Saint-Germain an tlawh zui dawn a, first leg-ah 2-0 in an tlawm tawh avangin hna a hautak dawn. Saints laka goal hnih chhuah team tan tlarhnung rem phui a pawimawh ang.