Vawiinah NorthEast Derby khel dawn

Aizawl FC-in an match hnuhnung berah Gokulam Kerala 3-1 a an hneh avangin season tharah I League an la khel zel dawn tih a chiang a, vawiin chawhnu dar 2:00-ah Shillong Lajong hma hun an chinfel sak dawn thung.

Meghalaya club hian table mawngphah luahin relegate thei dinhmunah an ding mek a, Mizo club lakah hian an chak lo a nih chuan season thara I League beiseina a bo tlukah a ngaih theih ang. Mahse, Shillong Lajong coach Alison Kharsyntiew chuan, "Hnehna chan theih kan inbeisei a, kan inhamtan theih ka la beisei fan a, NorthEast derby a nih vangin kan buai lo bawk," a ti a, Aizawl FC hneh ngei an tum thu a sawi. Aizawl FC-in tlawm an tum bik lo. Coach Standly Rozario chuan, "Relegate lo chiang tawh mah ila Super Cup kan la khel dawn a, inrintawkna nei turin chak zel a pawimawh," a ti.

Vawiin inkhel en duh tan chawhma dar 11:00 aṭangin Mualpui Kawnah (Zero Point) ticket lei theih a ni ang.

Inrintawkna leh player
Aizawl FC tan hliam vangin defender Kareem Omolaja Nurain leh captain Alfred Jaryan te an inlan thei dawn lo a, mahse Standly chuan an buai phah loh tur thu a sawi.

East Bengal boss hlui chuan, "Mizo player-te hian talent ṭha tak an nei a, an mamawh chu inrintawkna a ni. He hmun ka pan hnuah an inringtawka, result pawh kan nei ṭha. Player pahnih hi awm lo mah se a thlakna tur ṭha tak tak kan nei a ni," a ti.

Aizawl FC hian an champion season-a an match hnuhnung berah Shillong Lajong hi an tum a, 1-1 a inhnehtawkin an champion phah - Meghalaya club hma hun chu Aizawl FC kutah a innghat ve ta thung a, Mizo club hian 'khawngaih' an tum lo ang. Shillong Lajong hi Mizo tlangval Samuel Lalmuanpuia captain-na hnuaia khel an ni a, Zemabawk North tlangval hi ven bik ngai player a ni.

East Bengal an chak

Kolkata club East Bengal chuan nimin khan 1-0 in khualmualah Minerva Punjab an hneh a, I League nomawi an beiseina an chhi nung - point khatin hmahruaitu Chennai City an phak lo. East Bengal hian an match hnuhnung berah Gokulam Kerala an la lenchilh dawn a, Chennai City hian Minerva an mikhual dawn thung.

I League-ah head-to-head en a nih avangin East Bengal tan champion tur chuan Gokulam hneh ngei ngei a ngai a, Minerva-in Chennai hi an lo hneh a ngai bawk. East Bengal hi chak se, Chennai hian Minerva inhnehtawkpui ta se, head-to-head ah Chennai an ngam loh avangin point inangah an champion lo zawk ang.