Medical centre atan Dortmund khelmual
German rama stadium lian ber Signal-Iduna-Park chu coronavirus leng mek vangin medical centre atan hman lailawk a ni dawn. Khelmual neitu Borussia Dortmund chuan an stadium hman a nih tur thu hi an puang.
Dortmund director pahnih Hans-Joachim Watzke leh Carsten Cramer te chuan thuchhuah siamin, "Kan khelmual hi kan ram khawpui hmel lanna pakhat a ni a, ṭanpui ngai leh enkawl ngaite puih theihna hmun atan hman a ni ang," an ti.
Bundesliga club hian an khelmual hmar lam mipui ṭhutna chu an tualchhung damdawi lam thiamte nena thawkhoin damlo enkawl nan an hmang dawn a, he hmun hi inentirna, damdawi sem chhuah leh Covid-19 kai enkawl chhunzawm nan hman a ni ang.
Real Madrid khelmual Santiago Bernabeu chu coronavirus vanga damlote enkawlna damdawi chhekkhawl nan an phal thu an lo sawi tawh a, European club lian khelmual zingah Signal-Iduna-Park hi Covid-19 tana hman pahnihna a ni.