Meitei te ST status pek phutin kawng zawh
Scheduled Tribe De-mand Committee of Manipur (STDCM) huaihawtin Pathianni khan Meetei/Meitei te Scheduled Tribes list-a telh phutin Imphal-ah kawngzawh a ni.
STDCM chuan an thil phut chungchangah state sorkarin a ngaihsak tawk loh avanga an lungawi loh thu sawiin, Imphal-a kawngpui pawimwhte zawhin, Imphal East district-a Hafta Kangjeibung-ah public meeting an buatsaih zui bawk.
ST list-a Meetei/ Meitei te dah an phut chungchangah Ministry of Tribal Affairs chuan kum 2013, May 29 khan state sorkar hnenah rawtna thehlut turin a lo hriattir tawh niin STDCM chuan a sawi a, mahse Manipur sorkar chuan thu thlengin rawtna hi a la thehlut lo a ni, an ti.
Meitei hnamte dikna chanvo humhalh sakna tur leh chimrala an awm mai tur venna atana he movement hi kalpui an nih thu STDCM general secretary L Lokendra chuan a sawi.
STDCM chuan Meitei te chuah chu hmarchhak biala ST list-a telh loh an ni tawh tih a sawi. Tun hnaiah Assam-a Tai-Ahom leh Tea Tribe chu list-ah hian telh an lo ni tawh a ni.
Meeting-ah hian resolution pathum siam ani bawk a, state sorkar chu March 6 hma ngeia sorkar laipui hnenah rawtna thlen tura phutin, hei hi a tipuitling lo a nih chuan March 9-ah darkar 36 awh nawrh huaihawtah an vau.
Hei bakah public movement thlawp lo tu political party te laka lungawi loh thu pass niin, an thil phut hi tihhlawhtlin a nih loh chuan March 11 aṭangin railway line siam hna thawk mek chu danah an vau bawk a ni.
Hetihlai hian state chhunga zirlai pawl ṭhenkhat chuan STDCM thil phut hi an thlawp lo thung a, hei hian state chhunga tribal-te dinhmun thlengin a nghawng thei dawn niin an sawi.