Inter-ah Martinez a rinawm – agent
Tunlai striker hmuhnawm zinga mi Lautaro Martinez hi club lian ṭhenkhatin an ngaihven mek, mahse a agent Beto Yaque chuan a player hi a khelh mekna Inter Milan tan a rinawm thu a sawi chhuak.
Argentina international Martinez hi Barcelona chuan Luis Suarez thlak nan an duh nia sawi a awm, Spanish club lian dang Real Madrid pawhin an tlarhma timawitu atan an duh niin an sawi.
Yaque chuan tun season inelna hrang hranga goal 16 khung tawh Martinez chanchin sawiin, "Barcelona leh Real Madrid ten an duh tia sawi a awm, mahse tunah chuan engmah a thleng rih lo ang. A hma hun hi kan sawidun rih ngai lem lo.
"Thil hrang hrang sawiin kan titi fo a, chung zingah chuan club thar lam a ri lo, a awmzia chu Inter Milan tana khelh hi nuam a ti rih. San Siro hi a tan chuan a nuam tawk em em a ni," tiin a sawi.
Antonio Conte kaihhruaina hnuaiah Inter Milan an indin thar leh mek a, Serie A lamah pawh champion lai Juventus an nek buai nasa hle. Argentine tlangval tan Inter Milan tana hming chher chhunzawm hi a sual kher lo ang.