Champions League Real leh Tottenham zaninah inlan dawn
Zanin dar 1:30-ah Champions League last 16 inkhel pahnih a awm dawn a, champion lai Real Madrid leh English club ngaihven hlawh Tottenham Hotspur-te hma hun a chiang dawn.
Real Madrid hian khualmuala 2-1 a an hneh tawh hnu Ajax an mikhual dawn a, Tottenham hian 3-0 a an ngam hnu Borussia Dortmund an lenchilh thung ang. Ajax tan tlang tur chuan si hnih fai tala Real hneh a ngai dawn a, a awlsam dawn lo tih a chiang. Spurs-in Wembley lakah goal thum ngawt an khung tawh avangin tlang tura ngaih an ni a, Dortmund tan a awlsam dawn lo.
Ramos tel lohna
Real Madrid captain Sergio Ramos chu Ajax nen an inhmachhawn hmasakah yellow card pek a ni a, tun inelnaa a yellow card pathumna a nih avangin Ajax hi a hmachhawn thei dawn lo.
Ramos hian first leg-a an inkhela yellow card a hmuh hi a tih 'luih' a nih thu a sawi - hei hi a chhan ber chu quarterfinal lut turin an dinhmun a ṭha tawh tho a, second leg-a yellow card 'pathumna' hmua quarterfinal khelh loh a hlauh vang a ni.
UEFA danah chuan player-in yellow card pathum an hmuh hian an match lehpek atan hrem an ni ṭhin a, semifinal chinah erawh yellow card hi thaibo a ni - mahse Ramos hi match khat atan hrem belh a ni ta tho a, quarterfinal inlan pawh nise first leg-a inlan thei lo ang.
Ramos a inchhir ang
Ajax midfielder duhawm, season thara Barcelona zawm tur Frenkie de Jong chuan Sergio Ramos hi yellow card a hmuh luih avanga a inchhir tur thu a sawi - chak a tum hle.
De Jong chuan, "Real hi tlang tura beisei zawk chu an ni ngei a, mahse tun hi a tawpna a la ni lo. Beisei kan la nei a ni," tiin Santiago Bernabeu-ah hnehna chan an tum thu a sawi. Ajax hi Real an ngam loh danah an vanduai tia sawi theih a ni a, khami hnuah khan match thum khel leh tawhin hnehna an chang vek a, goal 13 khungin an lamah goal khat chiah a lut - Real hneh turin an ṭha tawk.
Real erawh chu...
Season thum chhung a zawnin Champions League-ah Real Madrid champion tawh mah se season duhawm tak an hmang lem lo a, Ajax hi tlang zawk pawh ni se a 'mak' tia sawi tur a ni lo.
Real hi a zawna El Clasico-a Barcelona ngam lo hlim an ni a, Barca an hmachhawn hmaa an match hnuhnung berah Levante chu 2-1 in hneh mah se chak turin referee puihna an mamawh! Zaninah Ajax hi an ngam lo a nih ngat chuan coach Santiago Solari dinhmun a derthawng nghal ang tih a chiang a, Argentine coach hian a hna chan a duh dawn loh avangin Karim Benzema leh Vinicius Junior-te an pu chhan turin an pawimawh khawp ang.
Spurs vs Dortmund
Dortmund khelmualah si thum khung sain Spurs lenglut dawn mah se Dortmund an hneh hnua an match pathumah chak an neih miah loh avangin inrintawkna an tlakchham lai tak a ni.
Tottenham boss Mauricio Pochettino chuan, "Dortmund hmachhawn tura zin tur kan nih avangin a harsa dawn a, result ṭha tak nei chunga zin nan duhawm tak a ni," a ti a, tun hnaia an result ṭha lo chuan nghawng a neih a hlauh thu a sawi. Dortmund an ropui bik lo. Spurs an ngam loh hnuah match thum khelin vawi khat chiah an chak a, Bayern Munich nen Bundesliga-ah an point hmuh zat a inang leh tawh - Spurs lakah si thum an phurh sa avangin a harsa ang.