Liverpool-in nomawi an thlauh?

Merseyside derby-ah Liverpool-in hnehna an chang zo lo a, table-ah pahnihnaah tla thlain Manchester City chu Premier League hmahruaitu an ni.

Pathianni zan khan Liverpool hian an ṭhenawm Everton khelmualah goal an kung lo a, 0-0 a an inhnehtawk avangin point khata City phak loin pahnihna an ni mek. Premier League-ah match kua chiah khelh tur a awm tawh avangin mi tam tak chuan Liverpool hian nomawi an 'thlauh'-ah an ngai a, a awm lo hran lo.

Liverpool boss Jurgen Klopp erawhin beiseina a la nei a, "Kan inum chho zel dawn a, buaina ka nei lo," tiin an result avanga a chi-ai loh thu a sawi.

Goal a bo!
Goodison Park-a inkhelah Liverpool chu chance hlauhawm nei ngun zawk an ni a, chak phu zawk pawh an ni - mahse an chhuanvawr Mohamed Salah chuan vawi hnih ngawt holam takin hun a khawhral.

Egyptian forward hian Everton goalkeeper Jordan Pickford chiah a hmachhawn chungin a paltlang thei lo a, a hun ṭha neih a pet hmaa Michael Keane-a'n a rawn tlawhchhuah sak hmanah pawh Salah a che muang hret. Reds hian na takin Everton tlarhnung nawr fo mah se chance hlauhawm tia sawi tur erawh an nei tam bik lo. Minute 54-naa Trent Alexander-Arnold shot hnuah target-a shot an nei tawh lo.

Hun tawp ham rik a rik rualin Goodison Park-ah mipui thawm a ring a, Everton fan-ten an hmelma kumhlun nomawi chawina remchang an tih 'tlawlh' sakah an inngai.

A la tawp lo
Kumthar Ni-ah khan Liverpool hi Manchester City aiin point sarihin an sang fal a, Etihad Stadium-a City an ngam loh hnuah point liin an inthlau leh a, tunah erawh point khatin an hnufual ta!

Reds defender Andy Robertson chuan, "Tunah chuan a umtu zawk kan ni ta a, Manchester City tan pressure a na tawh viau ang," a ti a, an dinhmun a him thu a sawi. Liverpool boss Klopp chuan, "Chance duhawm tak tak kan nei a, mahse Pickford emaw defender an lo awm zel a, anni khan chance mumal an neih ka hre lo," a ti.

Klopp chuan sawi zawmin, "March-a hmahruaitu nih hi duhawm viau mah se kan ni thei ta lo a nih pawhin a pawi lo. Match khelh tur tam tak a la awm a ni," tiin a beidawng lo.

Date Liverpool hmabak Date Man City hmabak
10-Mar Burnley (H) 09-Mar Watford (H)
17-Mar Fulham (A)
31-Mar Spurs (H) 30-Mar Fulham (A)
05-Apr Saints (A) 06-Apr Cardiff (H)
14-Apr Chelsea (H) 14-Apr Crystal Palace (A)
21-Apr Cardiff (A) 20-Apr Tottenham (H)
24-Apr Man United (A)
26-Apr Huddersfield (H) 28-Apr Burnley (A)
04-May Newcastle (A) 04-May Leicester (H)
12-May Wolves (H) 12-May Brighton (A)

*H=Home A=Away

Inkhel Result
Watford 2 - 1 Leicester City
Fulham 1 - 2 Chelsea
Everton 0 - 0 Liverpool