Aizawl FC-in Shillong Lajong an pet tla

Nimin tlai inkhelah Aizawl FC-in Shillong Lajong 4-1 in an hneh a, India hmarchhak aṭanga I League khel hmasa ber Lajong an relegate.

Mizo club tan hian Ghanefo Ansumana Kromah-a'n goal hnih a khung bakah Lalkhawpuimawia leh Isak Vanlalruatfela ten goal khat ve ve an khung a, injury time-ah Lajong-in Donboklang Lyngdoh hmangin goal khat an khung ve hram. Mizo club hian point 21 hmuin table-ah pariatnaah an awm a, March 9-a Churchill Brothers an mikhual huna point an hmuh hrim hrim chuan pasarihnaah an awm thei ang.

Standly hoin an ding
Aizawl FC-in coach Standly Rosario hnuaiah an che ṭha a, kumin I League-a an chak chian ber ṭum an tawng. Mizo club hian an match hmasa berah foreigner nei lo Shillong Lajong chu khualmualah 2-1 in an hneh lo a, Gift Raikhan-a hnuaiah AFC hian match 11 aṭangin point 10 chiah an hlawh chhuak.

Match riat a la awm tihin Gift-a'n banna a thehlut a, Aizawl FC hian coach nei loin Real Kashmir nen goal awm loin an inhnehtawk. Standly hian match sarih a la awm tihin a enkawl ṭan a, match hmasa berah Chennai City hneh lo mah se match ruk dang aṭangin point 11 an hlawh chhuak.

Inkhelh banah Standly Rosario chuan, "Tunah chuan ka nauten inrintawkna an nei tawh a, foreigner pathum Dodoz, Kareem leh Alfred tel lo chungin goal li kan khung thei hi ka lawm hle," tiin Vanglaini a hrilh a, Super Cup atan an inpuahchah ṭan thu a sawi bawk.

Mangṭha Lajong
Shillong Lajong-in foreigner la loin I League an hmachhawn a, hei chauh hi ni loin kum naupang rual an chhawr. Aizawl FC an hmachhawn ṭuma an squad 18 zinga pahnih chiah chu kum 22 chunglam an ni a, an naupanna a lang.

Lajong coach Alison Kharsyntiew chuan, "Foreigner tel loa khelh chu a harsa a, kan result ṭhat lohna chhan pawh a ni. Amaherawhchu kan club kalphungah hian sawisel tur ka nei lo a, player naupang ṭha tak tak kan chher chhuak a ni," tiinVanglaini a hrilh a, an relegate chungchang erawh a sawi zui duh lo thung.