Wimbledon champion nih rei chu a mak dangdai - Halep
Simona Halep chuan kumina Wimbledon an nei dawn lo chu a ui thu a sawi a, chutihrualin champion title kum hnih a zawna a kawl tur chu a hlu dangdai hlea a hriat thu a sawi bawk.
Coronavirus vangin July thlaa khelh tur Wimbledon chu ṭhulh a ni tawh, hmeichhe singles champion Halep leh mipa champion Novak Djokovic te chuan nakkum thleng an nomawi an kawl zui dawn.
Romanian nula Halep chuan, "Wimbledon an ṭhulh tih an puan ni kha chu hun hrehawm tak chu a ni. Thawmhnaw var veka inthuam lai kha ka ngai a, stadium ropui leh fans ṭha tak takte thlengin ka ngai vek mai.
"Wimbledon kha duh ni se chuan entu nei loa khelh theih a ni. Amaherawhchu, thuneitu lamin fans pawimawhna leh mipui hriselna an ngaih pawimawhzia a lang chiang a, an thutlukna hi a dikin ka thlawp," a ti.
World number 1 hlui Halep chuan sawi zawmin, "Tun hma lama kan la hmachhawn ngai loh natna nen kan inbei mek a ni a, sorkar leh damdawi lam thiamte thu sawi leh thupek kan zawm a ngai a ni," tiin a sawi.
Halep hian Romania rama Covid-19 do nan pawisa a lo thawh tawh, ani bakah hian tennis khel thiam player hrang hrang chuan an ram tan ṭheuh pawisa an thawh nasa tawh hle bawk.