Chhinga Vengin an mual an hmang thiam

2nd Division League-ah Chhinga Vengin nimin khan New Barrackpore Rainbow chu Imanuel HS Lalṭhazuala hattrick hmangin 3-1 in hma an hneh a, table chung bera an dinhmun an nemnghet.

Chhingcows hian Rainbow hi Kolkata-ah draw mah se tun ṭuma an hneh tak avang hian an group-a team awm zawng zawng an hneh vek tawh a ni.

A awlsam lo
Chhingcows-in hneh lo hret mah se Bawngkawn tlangval Zuala goal ṭha tak hmangin minute 24-naah hma an hruai a, amaherawhchu goal khung thei bik striker Joel Sunday hmangin Rainbow-in minute 44-naah an sut. Sunday-a hi Aizawl FC tan pawh a khel tawh kha a ni a, nikum December thla khan Gokulam Kerala tan khelin RG Stadium-ah hian a club hlui AFC lakah goal hnih a khung.

Minute 45 chhung Chhinga Veng an ṭang tluan a, halftime-ah coach Lalsangzuala Hmar-in thu ṭha fahin second half-ah inhliam MS Dawngliana aiah Lalmuansanga rawn lut bawkin inkhel chawhnu lam a danglam. Mizo club-in inkhel an thunun zawk a, chutihrualin an goal hnih khung belh erawh penalty ve ve niin Zuala'n goal-ah a chantir ve ve.

Eng nge an sawi?
Rainbow coach Jahar Das chuan, "Ka tan chuan mahni muala khel ang mai a ni a, amaherawhchu Aizawl kan rawn thlen tlai kan tuar a ni. First half kan khel ṭha viau a, second half-ah erawh ṭang tur kan nei tawh lo. March 10-ah Trau kan mikhaul dawn a, kan chak loh chuan final round luh a harsa tawh ang," tiin Vanglaini a hrilh.

Chhinga Veng coach Lalsangzuala Hmar chuan, "First half-a kan chetfuh tak loah chuan halftime minute 15 kha kan thlahlel a, second half-ah inkhel kalhmang a dang kha kan lawm hle. Chutihrualin hnehna chang mah ila final round lam chu kan la ngaihtuah ngam lo," tiin a sawi.

CVFC hian March 12-ah Howrah Stadium-ah ATK Reserves an hmachhawn dawn. 2nd Division League-ah team 16 chu group pathumah an ṭhen a, group khat aṭangin a sang pahnih ṭheuhin final round an lut dawn. Final round-ah hian ISL club reserves team-te an tel ve thei lo.