Bayern coach Flick a nghet
Bayern Munich chuan an coach Hansi Flick chu hun rei zawk atan inremna an neihpui. An inremna ang chuan Filck-a'n German champion hi kum 2023 June thla thleng a enkawl chhunzawm ang.
Kum 55 mi Flick hian season tir khan Bayern hi a zawm a, a tirah chuan Niko Kovac thachhang dawltu a ni. November 3 khan Kovac hi ban a ni a, team enkawl hna hi Flick chuan a nghet loin a thawk lailawk.
A tirah chuan nikum December thla thleng enkawl tur kha a ni, a hnuah season tawp thleng atan an pawt sei. Match 21 a khelhpuiah vawi 18 ngawt hnehna a chanpui a, tunah chuan contract ṭha leh duhawm zawk a ziah theih phah.
Bayern chief executive Karl-Heinz Rummenigge chuan, "Hansi Flick hnathawhah club chu a lawm tawk. A kaihhruaina hnuaiah nasa takin hma kan sawn a, chu chu kan result-ah a rawn lang chhuak. German club zingah tunah chuan inelna lian pathuma dam vek awm chhun kan ni," tiin an coach an rintawk thu a sawi.
Flick enkawlna hnuaiah Bayern hi Bundesliga hmahruaitu an ni mek, an elpui Borussia Dortmund aiin point liin an sang zawk. Champions League-ah Chelsea hnehnin quarterfinal an lut tawh bawk.